MTA-KFP husu diretór nasionál hotu atu servisu ho responsabilidade
DILI, 14 marsu 2024 (TATOLI) – Ministériu Turismu no Ambiente (MTA), hamutuk ho Komisaun Funsaun Publika (KFP), fó tomada pose no aseitasaun ba diretór jerál sira no nasionál hamutuk 20, atu servisu ho responsabilidade ba kna’ar ne’ebé mak iha ho objetivu atu servi nasaun Timor-Leste ho di’ak.
“Ha’u husu ba emposadu sira katak servisu ho responsabilidade, atu bele servi nasaun ida-ne’e, tanba ita hotu servidór ba povu ho fuan, atu servi estadu no rai ida-ne’e”, Vise Primeiru Ministru no Ministru Koordenadór Asuntu Ekonómiku no Ministru Turismu Ambiente, Francisco Kalbuadi Lay, informa iha ámbitu serimónia tomada pose no aseitasaun ba diretór jerál sira no nasionál iha salaun Ministru Turismu Ambiente, Farol, ohin.
Iha fatin hanesan, Prezidente Komisaun Funsaun Publika, Agostinho Letêncio de Deus, dehan emposadu sira-ne’e mak rekursu umanu turismu nian ne’ebé mak atu servi ba povu ho rai ida-ne’e ho di’ak.
Nia afirma, turista sira, iha semana kotuk, mai vizita ona Timor-Leste, entaun ita boot sira-nia responsabilidade atu kontinua promove turismu ba oin, tanba ne’e mak kada dirijente sira ne’ebé mak marka prezensa iha ne’e atu implementa polítika Governu nian ho tematiku turismu nian.
“Jestór foun sira tenke iha koñesimentu atu halo balansu ba turismu prevensaun ba ita-nia rekursu naturál no kultura sira, tanba ita boot sira servisu la’os de’it ba komunidade, maibé ita boot sira-nia servisu kontribui moris di’ak funsionáriu publiku nian”, nia relata.
Emposada husi Ministériu Turismu no Ambiente ne’ebé simu pose hamutuk 20 mak Odete Mascarinhas hanesan Diretora Jerál Servisu koorporativu, Domingos Mesquita hanesan Diretór Nasionál Planeamentu Finansas no Adminsitrasaun, Prizenio Roncalio Maria Tomas Sarmento Assis hanesan Diretór Nasionál Rekursu umanus. Lucio Soares Babo hanesan Diretór Nasionál Aprovizionamentu, Alcino Vasconselhos Exposto hanesan Diretór Nasionál Lojístika, Jose Filipe Quintas Dias hanesan Diretór Nasionál Estatístika no Peskiza.
Antonio da Silva hanesan Diretór Jerál Turismu, Rosita Garcia de Sousa hanesan Diretora Nasionál Dezenvolvimentu Turístika, Maria Ernestina Lopes hanesan Diretora Nasionál Empredimentu Atividade Produtu Turístiku, Ivania Ros Ximenes Gonçalves hanesan Diretora Nasionál Marketing Turismu no Relasaun Internasionál, Francisco Xavier Fatima hanesan Diretór Jerál Ambiente.
João Carlos Soares hanesan Diretór Nasionál Alterasaun Klimátika, Flaminio Maria Esteves Xavier hanesan Diretór Nasionál Biodiversidade, Arlindo Silveira hanesan Diretór Nasionál Kontrolu Poluisaun, Elia Luisa Santa Perreira hanesan Diretora Sentru Edukasaun no Informasaun Ambientál Kargu Ekiperadu no Diretora Nasionál.
Rogerio Paulo Gonzaga da Costa Martins hanesan Inspetór Gia Kargu Ekiperadu no Diretora Nasionál Gabinete Inspesaun Auditoria, Anibal Carvalho Martins hanesan Inspetór no Inspesaun Jerál jogus, Edmu Benjamin Coelho Lopes hanesan Sub Inspetor, Luis Imanuel Soares Doutel hanesan Sub Inspetór Auditoria Inetrna, Agostinho Marçal hanesan Diretór Nasionál Turismu Komunitariu no Ekolójiku.
Jornalista : Felicidade Ximenes
Editór : Zezito Silva
