Autoridade husu Shanghai halo manutensaun ba estrada diresaun Ermera-Fatubesi
ERMERA, 17 marsu 2024 (TATOLI) – Autoridade Postu Administrativu Hatulia B husu Kompañia Shanghai Construction Group (SCG) atu imediata halo manutensaun ba Estrada diresaun Ermera Vila – Fatubesi.
Administrador Postu Administrativu Hatulia B, Sertório dos Santos Madeira hato’o katak kondisaun Estrada refere komesa aat ba beibeik, no persiza rehabilitasaun.
Líder lokál ne’e husu ba kompañia Sanghai atu halo rehabilitasaun ba estrada refere “tanba agora dadauk estrada barak mak aat.”
“Ami sempre haree sira (Kompañia Sanghai) mai halo hela de’it follow up no sukat hela de’it estrada sira ne’e maibé too agora seidauk realiza (halo rehabilitasaun),” Sertório ba Tatoli iha nia kanaar fatin, Hatulia B.
Administradór ne’e hatete rehabilitasaun ba estrada ne’e responsabilidade kompañia nian tanba orsamentu ba konstrusaun estrada ne’e finansia husi Uniaun Europeia liu husi Banku Aziátiku Dezenvolvimentu (ADB, sigla inglés)
Sertório husu ba kompañia Sanghai bainhira halo rehabilitasaun atu loke luan tan estrada ne’e atu nune’e bele fó espasu ba kareta bele sees malu ho di’ak.
“Estrada ne’e ita kategoria ligasaun entre kapitál munisípiu ba postu Administrativu Ermera Vila no Hatulia B. Estrada ne’e mos bele liga mos ba munisípiu Bobonaru,” nia akresenta.
Antes ne’e, Felisberto das Neves, nu’udar Xefe Suku Poetete, Postu Administrativu Ermera Vila mos husu ba kompañia Shanghai atu imediatamente halo manutensaun ba Estrada refere.
“Estrada Ermera Vila – Fatubesi ne’e agora iha kondisaun la di’ak. Konstrusaun ba Estrada ne’e foin mak remata no sedauk inagura maibé komesa at ona,” Líder komunitária subliña.
Nia dehan karik kompañia la halo manutensaun, Ministériu Obras Públika (MOP) tenke foti medida atu obriga kompañia ne’e halo manutensaun ba Estrada refere.
“Ami husu Shanghai Construction tenke mai hadi’a agora atu Estrada ne’e labele at ba bebeik hodi fasilita ita nia komunidade rurál sira. Estrada ne’e importante tanba liga postu adminsitrativu Ermera Vila no Postu Adminsitrativu Hatulia B,” Felisberto salienta.
Estrada Ermera-Fatubessi ho distánsia kilómetru 11,81, hetan rehabilitasaun ho kustu $4.2 miliaun resin.
Jornalista: Afonso do Rosario
Editór: Filomeno Martins
