Autoridade husu MAPPF aselera kontratu funsionáriu agrikultura iha Baucau
BAUCAU, 09 janeiru 2024 (TATOLI) – Autoridade Administrasaun Munisipál husu Ministériu Agrikultura, Pekuária, Peska no Florestra (MAPPF) atu aselera kontratu ba funsionáriu sira iha Servisu Munisipál Agrikultura Baucau.
Prezidente Autoridade Munísipiu (PAM) Baukau, Veneranda Eurico Marques Lemos Martins, informa, funsionáriu sira iha Servisu Munisipál Agrikultura ne’ebé remata kontratu iha fulan-dezembru tinan-2023 tanba deskola ba suku 59, postu administrativu neen iha munisípiu Baucau.
“Bainhira extensionista sira-ne’e iha hotu ona mak komunidade sira iha Baucau la hakilar ona ba atendimentu agrikultura nian,” Prezidente Autoridade Munisipál Baucau hateten iha Vila Nova, segunda ne’e.
Autoridade Baucau sujere atu MAPPF halo rekrutamentu funsionáriu hodi aumenta númeru estensionista ne’ebé atuál iha de’it 40 no sei presiza tán na’in-19 nune’e bele desloka ba suku 59 iha munisípiu Baucau.
Ministru Agrikultura, Pekuária, Peska no Floresta (MAPPF), Marcos da Cruz, promete, sei rezolve estatutu funsionáriu kontratadu sira iha munisípiu Baucau liuliu aumenta numéru extensionista no buka solusaun sira-ne’ebé idade avansadu ona.
“Funsionáriu extensionista numéru iha Baucau seidauk sufisiente, balun idade avansadu, labele halo movimentu ona,” Marcos da Cruz akresenta.
Governante nee mos rekoñeseese, pesoál extensionista mak tékniku di’ak ba komunidade agrikultór sira, tanba ne’e husu atu komunidade hakbesik-aan ba komunidade agrikultór sira hodi fasilita tékniku agrikultura nian, nunee bele aumenta númeru produsaun.
Totál funsionáriu hamutuk na’in-43 mak termina ona kontratu iha Servisu Munisipál Agrikultura Baucau, maibé sei kontinua serbisu ho voluntáriu iha Servisu Munisipál Agrikultura Baucau.
Hosi funsionáriu 43 ne’e kompostu hosi kazuál na’in-13 hanesan apoia administrasaun na’in-ida no na’in-ualu seluk nu’udar tékniku pekuária, veterinária no bokadura hein odamatan kanál irrigasaun na’in-lima.
Alende ne’e, funsionáriu ajente na’in-30 kompostu operadór ba tratór hamutuk na’in-20 resin no ajente pekuária inklui tékniku veterinária.
Jornalista : Natalino Belo
Editór : Evaristo Soares Martins
