MCI loke bazar baratu iha Portu Dili hodi komemora loron paskua
DILI, 18 marsu 2024 (TATOLI) – Ministériu Komérsiu no Indústria (MCI), liuhosi Diresaun Nasionál Komérsiu Internu, loke bazar baratu iha Portu Dili, ho objetivu atu komemora loron boot paskua ho presu razoavel ba konsumidór sira.
“Ministériu Komérsiu Indústria selebra bazar baratu ida-ne’e hodi selebra loron boot paskua, entaun feira ida-ne’e organiza loja sira ne’ebé mak durante ne’e hala’o atividade komérsiu hodi bele mai partilla sira-nia negósiu ba komunidade sira ho sira-nia presu ne’ebé mak razoavel”, Vise Ministru Komérsiu Indústria Agusto Junior Trindade, informa hafoin halo abertura ba bazar baratu iha Portu Dili, ohin.
Nia dehan, sasan ne’ebé empreza faan ho nia presu razoavel tanba folin la hanesan ona iha loja sira. Durante loron tolu ne’e sira faan mina $4.75, supermi falun hitu $1, entaun ida-ne’e ajuda komunidade sira atu mai hodi sosa nesesidade bázika sira-ne’e.
“Ita loke ida-ne’e durante loron tolu, hahú ohin to’o 20 marsu, ba nesesidade bázika sira atu ita-nia konsumidór sira bele asesu hodi bele hola sira-nia sasan, nune’e bele konsumu iha família ida-nia laran hanesan foos, mina, manutolun, terigu, masin midar no seluk tan”, Trindade dehan.
Trindade akresenta, iha loron tolu ne’e, MCI la autoriza atu loke divertimentu ba públiku, tanba tama hela ba loron paskua ho nune’e husu ba ema hotu atu bele mai partisipa iha bazar baratu hodi hola nesesidade bázika ne’e.
“Ami fó loron tolu ba bazar baratu ida-ne’e tanba empreza sira ne’e atu ba loke tan iha munisípiu sira, nune’e bele besik liu ba komunidade sira atu bele kompra, entaun ida-ne’e mak ami halo tanba ita hatene katak ita-nia preparasaun atu tama ba Domingo Ramos, entaun ita la foti tempu naruk liu, maibé ho loron tolu ne’e bele sufisiente ona”, nia informa.
Iha fatin hanesan, funsionáriu loja Kreativu Furak, Lidia Salsinha, sente kontente tanba Governu liuhosi MCI fó oportunidade hodi loke bazar baratu iha Portu Dili.
“Ami mai iha ne’e hodi faan foos ho presu ne’ebé mak la hanesan, ezemplu; foos Beras Mangkok Merah 15kg faan iha bazar baratu ho folin $13.25 cent, maibé ami fan iha loja ho presu $13.50 cent, nune’e foos beruang merah 20 kg $13 no ami fan iha loja ho presu $13.25”, Lidia dehan.
Lidia husu ba ema hotu hodi bele hakbesik aan ba Portu Dili hodi hola nesesidade bázika ne’ebé mak Governu liuhosi MCI hamutuk ho empreza sira ne’ebé loke bazar baratu durante loron tolu nia-laran.
Iha bazar baratu ne’e, mai husi empreza ualu hanesan Kreativu Furak, Dili Mart, Leader, Lisson, Perisos, Indomilk, Daya Marketing no Frabel.
Jornalista : Feliciadade Ximenes
Editór : Zezito Silva
