DILI, 19 marsu 2024 (TATOLI) – Cruz Vermella Timor-Leste (CVTL), tersa ne’e, fó formasaun ba jornalista 20 hosi instituisaun média sira iha Timor-Leste atu hasa’e konesimentu kona-bá salva vida ka primeiru sukoru.
“Formasaun ida ne’e, atu aumenta liutan jornalista sira nia konesimentu iha primeiru sukoru nian. Bainhira iha situasaun dezastre naturál, asidente ka konflitu mak mídia sira nia papél importante tebes atu halo kobertura tenke hatene mós kona-bá primeiru sukoru atu halo salvamentu mós ba ema seluk no ba sira nia aan rasik iha situasaun ne’ebé defisil,” Sekretáriu Jerál CVTL, Luis Pedro Pinto hatete ba jornalista sira iha formasaun ne’ebé realiza iha salaun CVTL Bairru-Formosa Dili, tersa ne’e.
Nia dehan, formasaun ne’e sei halo nafatin ba oin atu hasa’e jornalista sira nia abilidade iha situasaun defisil.
“Média nia papél importante mós atu divulga informasaun ba ita nia komuniade sira ho loloos kona-ba akontesimentu sira ne’ebé fó ameasa ba ema nia vida,” nia tenik.
Iha sorin seluk, Konsileira Konsellu Impresa Timor-Leste, Isabel Fernandes, reforsa kapasitasaun ba rekursu umanu importante tebes no agradese ba CVTL ne’ebé ho inisiativa di’ak realiza formasaun ne’e.
“Formasaun ne’e importante tebes ba jornalista sira atu komprinde kona-ba saida mak primeiru sukoru. Husu jornalista sira atu aproveita oportunidade ne’e ho di’ak, nune’e iha loron tolu ne’e bele apriende netik buat ruma,” Konseleira KI ne’e afirma.
Entertantu, Jornalista RTTL, EP, Bety Rebelo sente kontente ho formasaun ne’e tanba bele aumenta tan sira nia konesimentu bainhira halo kobertura iha situasaun dezastre.
“Sente kontente tebes tanba formasaun ne’e importante duni ba jornalista atu tuir. Iha formasaun ne’e formandu sira hosi CVTL hanorin ami kona-ba primeiru sukoru oinsa halo salvamentu ba ema nia vida iha situasaun dezastre,” nia katak.
Jornalista ne’ebé partisipa iha formasaun ne’e hamutuk na’in-20 mai hosi mídia oioin hanesan, Agência TATOLI, RTTL, EP, Timor Post, Hatutan.com, Radio Metro, GMN TV no seluk tan. Formasaun ne’e hala’o durante loron tolu hahú 19 to’o 21 marsu tinan 2024.
Notísia relevante:MS fó formasaun primeiru sokoru ba profisionál saúde 30-resin
Jornalista : Hortencio Sanchez
Editór : Florencio Mirada Ximenes
