Ekipa inspesaun konjunta identifika produsaun ice cream laiha kualidade
DILI, 05 abríl 2024 (TATOLI) – Ekipa inspesaun konjunta husi Autoridade Inspesaun Fiskalizasaun Atividade Ekonómika Sanitária no Alimentár (AIFAESA), Ministériu Komérsiu Indústria ( MCI), Inspesaun Jerál Tarballu (IGT), Servisu Rejistu no Verifikasaun Emprezariál (SERVE.IP), Ministériu Saúde no Polísia Nasionál Timor-Leste identifika fatin produsaun ice cream ne’ebé fa’an iha loja CYC Chenyancai Unipesoal Lda, konsidera laiha kualidade.
Loja CYC Chenyancai Unipesoal Lda, lokaliza iha Rai Kotu, Postu Administrativu Dom Aleixu no Munisípiu Dili.
“Ha’u rona informasaun mai husi MCI liuhosi Diresaun Reguladora Komersiál katak iha fatin CYC Chenyancai Unipesoal Lda, ida-ne’e halo duni produsaun ice cream maibé laiha kualidade. Ho ida-ne’e mak MCI halo kontatu ho ami, halo inspensaun iha ne’e, iha buat lubuk ida mak autór ekonómiku identifika mak ambiente la saudavel, produtu nia emblazem nia-laran hakerek estrobery maibé iha leten buat seluk, ninia loron espire ne’e iha semana rua maibé realidade hakarek eskrita ne’e 2025, depois lisensiamentu komersiál laiha”, Inspetór AIFAESA Ernesto Monteiro informa ba jornalista sira iha Rai Kotu, ohin.
Nia dehan, kestaun ida-ne’e haree katak empreza viola ona regra sira ne’ebé mak iha, no trabalhadór la tau uniforme hanesan masker, luvas atu garante saúde ema nian.
“Ami parte AIFAESA hola parte iha ne’e atu fó hatene katak ida-ne’e prosesa ba oin, tanba desizaun ami ekipa foti mak notika signifika xamada ba nia atu empreza bele aprezenta aan iha Segunda-feira hodi prosesa tuir regra ne’ebé mak iha, entaun agora ami sediauk foti desizaun iha ne’e, maibé kona-ba nia atividade provizóriu taka”, nia informa.
Nia esplika, empreza ne’e rasik halo produsaun ba ice cream durante tinan tolu no distribui ona ba munisípu hotu iha timor laran tomak.
“Tanba ida-ne’e mak ha’u husu ba operadór ekonómiku sira hotu katak ema ne’ebé mak faan no prodús ice cream ida-ne’e bele hapara, tanba ice cream ida-ne’e la di’ak ba ema nia saúde”, nia husu.
Iha fatin hanesan, Diretór Ezekutivu SERVE.IP, Florencio Sanhes, hateten Governu permite indústria kiik sira atu banati tuir regulamentu no lejislasaun sira ne’ebé mak aplika iha Timor-Leste.
“Lei permite ba atividade saida de’it maibé lei bandu ba atividade sira hotu sem iha regra”, Florencio Sanhes hateten.
Nia haktuir, iha atividade inspesaun ne’e tuir SERVE nia haree katak empreza ne’e laiha lisensiamentu ba atividade, tanba empreza ne’e uza lei 35/2017 ne’ebé mak revoga ona, agora dekretu lei foun 83/2022 ne’ebé mak hateten katak empreza hotu ne’ebé mak ezerse ekonomia atu ba fila fali SERVE hodi deklara sira-nia atividade.
“Empreza ohin ne’e la deklara loloos, nia hateten empreza ninia, maibé ikus mai dehan laos ninia, depois fatin ne’e laos ninia, sosa tutan de’it, entaun ita hakarak haree lei sosiedade komersiál hateten ema ruma mak na’in tenke iha sesaun konta. Entaun SERVE hakarak husu ida- ne’e iha segunda-feira atu hatudu mai ita, tuir lei sosiedade komersiál númeru 10/2017 ka lae, se ida-ne’e mak laiha ita sei fó multa tuir lei ne’ebé mak iha”, nia esplika.
Na’in ba Empreza loja CYC Chenyancai Unipesoal Lda, KeneLim, dehan produzaun ice cream ida-ne’e durante tina tolu ona halo iha Timor-Leste.
“Traballadór sira ne’ebé mak servisu iha ne’e na’in ualu mak halo produsaun ice cream, hahú husi tuku 8:00 dader to’o tuku 18:lokraik”, KeneLim afirma.
Traballadora, Berta Maria Soares, informa empreza la oferese luvas no maskara atu uza hodi halo produsaun ba ice cream.
“Ami servisu iha ne’e durante tinan ida ho balun ona, maibé empreza la oferese luvas, máskara no farda ida ba ami, entaun ami tenke prodús ice cream loron ida tenke 3.000 no to’o 6.000”. Berta Maria Soares konklui.
Jornalista : Felicidade Ximenes
Editór : Zezito Silva
