Elétrika iha armazein Baucau avaria impaktu ba prosesu pakotementu foos
BAUCAU, 03 abríl 2024 (TATOLI) – Armazein Rejionál Sentru Lojístika Nasionál iha Munisípiu Baucau (CLN, sigla portugés) seidauk halo pakotementu ba foos tanba elétrika iha fatin referidu avaria.
Xefe Armazein Rejionál Baucau, Domingos da Silva Sarmento, esplika, totál estoke foos rai iha CLN sentru armazein rejionál Baucau hamutuk tonelada 427.820, maibé to’o agora seidauk halo pakotementu tanba eletrisidade iha fatin referidu avaria.
“Ahi eletrisidade mak avaria no hato’o ona ba nasionál maibe ekipamentu hanaran transformadór mak seidauk iha nune’e seidauk halo pakotementu,” Xefe Armazein CLN Rejionál Baucau hateten iha Vila Nova, kuarta ne’e.
Alende ne’e, saka ba pakotementu seidauk distribui hosi CLN nasionál nune’e hatarde prosesu pakotementu inklui halo distribuisaun relasiona ho intervensaun folin foos iha merkadu.
Domingos Sarmento, argumenta, maske halo ona koordenasaun serbisu ho EDTL Baucau maibé parte EDTL laiha koñese rekoñesementu ba sistema eletrifikasaun iha Armazein Baucau nune’e situasaun referidu fó impaktu ba serbisu liuliu prosesu ekipamentu ne’ebé utiliza ba pakotementu.
“Tempu badak ha’u sei ba fali nasionál atu follow up kona-ba situasaun ne’e tanba prosesu pakotementu utiliza ekipamentu dijitalizasaun,” Domingos Sarmento akresenta.
Armazein Baucau antes halo serbisu sempre simu orientasaun tanba desizaun hotu iha dirijente nasionál hanesan materiál ba pakotementu inklui halo distribuisaun ba merkadu.
Bainhira pakotementu hotu sei distribui ba munisípiu haat hanesan Lautém, Viqueque, Manatuto no Baucau bazea ba pedidu hosi kada munisípiu ligadu ho situasaun iha baze.
Hosi totál estoke foos hamutuk 427.820 ne’ebé iha Armazein Baucau bainhira halo pakotementu ba saka kilograma 25 sei hetan saka 17.1128 no sei halo distribuisaun ba merkadu ho folin tuir kbiit komunidade nian.
Jornalista : Natalino Belo
Editór : Evaristo Soares Martins
