OÉ-CUSSE, 02 abríl 2024 (TATOLI) – Eskola Báziku Filiál (EBF) Masin, lokaliza iha aldeia Sanane, suku Costa, sub-rejiaun Pante Makasar, presiza moru protesaun tanba iha eskola refere hetan estraga beibeik hosi animál.
Notísia relevante: Autoridade RAEOA harii pré-eskolár rua no EBF ida iha aldeia Sanane
“Ami husu de’it, ami-nia lutu presiza hadi’a netik, tanba kadavez ami feriadu karau ho bibi mak nakonu iha eskola laran, agora ha’u kontente tanba Governu halo tán eskola foun iha EBF 30 Agostu Masin, ne’ebé ami husu de’it lutu tenki halo ona, nune’e ami-nia eskola bele kuda ai-funan no ai-oan bele moris hafurak eskola,” Koordenadór EBF 30 Aogosto Masin, Olinda Ximenes, ba jornalista sira iha Oé-Cusse, tersa ne’e.
Nia informa, la’ós problema animál de’it mak estraga maibé dalaruma vidru sira mós hetan estragu, tanba bainhira prosesu aprendizajen remata profesór no alunu sira fila hotu ba uma, ema deskoñesidu tama estraga vidru balu monu.
Notísia relevante: RAEOA aloka millaun $2-resin harii eskola foun 19 no hadi’a edifísiu rua
Tuir nia, eskola iha guarda maibé to’o lokraik nia mós presiza ba deskansa ona iha uma, sei hanesan uluk uma Estadu iha karik, entaun profesór balun bele hela iha ne’e no guarda mós bele toba iha eskola atu haree.
“Problema ne’e hato’o beibeik ona ba iha autoridade lokál sira, xefe aldeia no xefe suku inklui konsellu dos pais, agora pedidu atu hadi’a lutu ne’e, ha’u hatama ona ba iha Prezidente Autoridade RAEOA maibé to’o agora seidauk iha resposta ruma,” nia afirma.
Antes ne’e, Xefe Suku Costa, Francisco Colo, rekomenda mós ba Progama Nasionál Dezenvolvimentu Suku (PNDS), atu konsidera problema moru protesaun iha eskola EBF 30 Agostu Masin iha programa PNDS nian.
“Ha’u husu ba ekipa tékniku PNDS, atu haree asuntu ida iha eskola Masin ne’e, tanba besik estrada públiku movimentu transporte ba mai imajen ladi’ak, ba estudante sira, tanba maioria minoridade fó perigu ba sira-nia vida,” nia fó hanoin.
Hatán ba problema ne’e, Prezidente Autoridade RAEOA, Rogério Tiago Lobato, rekoñese no simu ona pedidu hosi parte eskola husu atu hadi’a moru protesaun ne’e.
“Ha’u simu ona pedidu ne’e, ida-ne’e ami bele rezolve, ha’u sei bolu Sekretária Rejionál ba Asuntu Edukasaun Solidariedade Sosiál atu haree asuntu ne’e, buka took orsamentu uitoan hodi hadi’a lutu ba eskola ne’e tanba besik estrada públiku mós,” nia promete.
Notísia relevante: Programa merenda eskolár iha Oé-Cusse sei iha faze elaborasaun
Entretantu, eskola EBF 30 Agostu Masin, daudaun ne’e akumula hela estudante 580 maka hala’o hela estudu ho profesór hamutuk na’in-18.
Jornalista: Abílio Elo Nini
Editór: Evaristo Soares Martins
