Reabilitasaun estrada rurál Afaçá-Uaitame foin atinji pursentu 37
BAUCAU, 09 abríl 2024 (TATOLI) – Progresu reabilitasaun estrada rurál iha suku Afaçá ba Uaitame, Postu administrativu Quelicai, munísipiu Baucau, ho orsamentu tinan 2022 nian foin atinje 37%.
Projeitu reabilitasaun estrada referida hamutuk pakote haat ho distánsia kilómetru 12 ne’ebé hahú obra iha fulan-abríl tinan-2022 to’o agora seidauk finaliza tanba fatór sosiál hanesan impedementu hosi komunidade.
Hosi pakote haat referdu ho totál orsamentu hamutuk $3,777,131.80 responsável hosi kompañia lokál hanesan pakote dahuluk kilómetru 0-3 implementa hosi kompañia Flores Unipesoal Lda ho orsamentu $510,231.96.
Pakote daruak kilómetru 3-6 responsabiliza hosi kompañia Helcia Unipesoal Lda $619,654.00, pakote datoluk hosi kilómetru 6-9, kompañia Dilidi Unipesoal Lda ($588,618.90) no pakote ikus kilómetru 9-12 responsabiliza hosi Lialura Unipesoal Lda ho orsamentu $535,828.40.
“Kauza mak fatór sosiál, maibe ita rezolve ona no extende ona kontratu nune’e agora kompañia sira kontinua ona servisu,” Diretór Servisu Munisipál Obra Públika, Agostinho Ximenes hateten iha Vila Nova, tersa ne’e.
Fatór sosiál mosu tanba komunidade sira hadau malu serbisu to’o ameasa no estragus sasán hosi kompañia nune’e impaktu ba progresu serbisu iha terrenu.
Servisu Obra Publiku Baucau hosi komunidade sira iha área Afasa no Uaitame atu koopera ho parte kompañia nune’e projetu reabilitasaun estrada iha fatin ne’ebá bele finaliza nune’e fasilita komunidade transporta produtu ba merkadu.
“Estrada sai preokupasaun komunidade, kauze iha suku hotu-hotu, kaundu projetu iha koopera tanba atu implementa projetu nia prosesu naruk, husu koopera nune’e obra hotu lalais,” Agostinho Ximenes akresenta.
Projetu ne’e tuir kontratu ho tipu reabilitasaun ne’ebé kada kompañia ezekuta maneira serbisu utiliza tipu rua hanesan plan no grevel inklui mos hadi’a bronjong (gabiaun) inklui konstrui valeta.
Jornalista : Natalino Belo
Editór : Evaristo Soares Martins
