iklan

EKONOMIA, HEADLINE

Abilio Araújo: investimentu “fiber optic” iha ona faze komersiál

Abilio Araújo: investimentu “fiber optic” iha ona faze komersiál

Prezidente SACOM Energia Lda, Abílio de Araújo. Imajen Tatoli/ Egas Cristóvão

DILI, 11 abríl 2024 (TATOLI)— Prezidente Kompañia SACOMTEL Lda, Abilio Araújo, informa, investimentu ba “fiber optic” ne’ebé liga hosi Singapura, Indonézia mai Timor-Leste tama ona iha faze komersiál.

Empreza na’in ne’e hato’o asuntu referidu hafoin hasoru malu Prezidente Repúblika, José Ramos Horta, iha Palasiu Prezidensiál, Bairru-Pité, kinta ne’e.

Notísia relevante: SACOMTEL : Horta lansa kabu ”fiber optic”, estabiliza rede internet

“Kona-bá progresun projetu “fiber optic” ita halo no koko ona, agora tama ona iha komersiál, ami nia baze iha Batugade ne’ebé ho naran SAKOMTEL Batugade internet international G2A agora distribui ona ba Timor Telecom,” Abilio hatete ba jornalista sira iha Palásiu Prezidensiál Dili, kinta ne’e.

Iha faze ona komersiál, Prezidente SACOMTEL tanba daudaun ne’e Timor Telecom halo ona instalasaun hosi Postu Batugade mai kapitál Dili no sei instala to’o Munisípiu hotu hodi hasa’e kualidade liña internet iha territóriu.

“Timor Telecom liga ona hosi sira nia Postu Batugade mai tama ona iha Dili laran, agora iha fatin balun asesu ona no balun seidauk asesu sei iha prosesu konfirmasaun. Maibé kapasidade ne’ebé sira sosa hosi SACOMTEL ne’e mak sei menus tebes,” nia katak.

SACOMTEL parseria ona ho Timor-Telecom

Emprezáriu timoroan ne’e esplika, daudaun kapasidade SACOMTEL nian agora iha Timor-Leste hamutuk 30Gb no daudaun ne’e operadór telekomunikasaun Timor Telecom foin sosa 4Gb.

“Entaun ami hanoin ona atu dada fali hosi Batugade mai Dili, tanba antes ne’e ita dada ona hosi Singapura mai Indonézia to’o ona mai Batugade, agora ita tenke dada fali hosi ne’ebá mai atu hasa’e liutan kualidade internet, bainhira ita tama ona iha Dili, ita bele lori ona kabu sira ne’e tama ba instituisaun Estadu no parte hotu ne’ebé presiza,” nia tenik.

Iha tinan 2025, nia garante garante kabu fiber optic bele sirkula ona iha Dili no territóriu tomak ho nia kapasidade bele aumenta to’o 100Gb.

“Uluk ne’e Timor Telcom, Telkomsel no Telemor iha sira nia (menara-tower) rasik, sira nia sentru iha Batugade mak foin bele simu fali torre hosi Atambua nian mak tiru hosi rádiu frekuénsia ida-ne’e mak ladun fó kualiade di’ak, kuandu tempu udan anin nia bele lakon nia kualidade. Maibé ita nian laiha, ita dada kabel ne’e tama direta ba Indonézia liuhosi Atambua,” nia haktuir.

Daudaun ne’e, operadór telekomunikasaun Timor Telecom de’it mak parseria ona ho SACOMTEL. Tanba ne’e empreza rasik sei lobby hela ho operadór Telekomcel no Telemor atu servisu hamutuk hodi fornese liña internet ne’ebé kualidade.

SACOMTEL koopera ho PT Indonézia

Rekorda fali katak, loron 20 fulan-novembru 2023 iha Palásiu Prezidensiál Dili, Prezidente Repúblika, José Ramos Horta, halo ona lansamentu ba kabu fiber optic ne’ebé ho nia Projetu responsabiliza hosi empreza SACOMTEL.

Objetivu lansamentu ida-ne’e atu halo ligasaun kabu fiber optic hosi Timor-Leste ba rai liur.

SACOMTEL halo ligasaun kabu fiber optic liuhosi Indonézia tanba Timor-Leste parseria ho empreza PT Indonézia ou PT-PLN İcont+ tanba empreza ne’e nia liga kabu fiber optic ne’e to’o Singapura.

SACOMTEL iha ona lisensa no iha planu investimentu ho finanseiru ne’ebé klaru, PT-PLN indonézia sai hanesan parseiru ba SACOMTEL tanba empreza Indonézia ne’e nia kabu fiber kobre Indonézia laran ho kilometru 275.000.

Abilio fiar katak bainhira kabu fiber optic ne’e instala hotu ona iha territóriu nasionál mak bele fó ona kualidade internet ba ema hotu iha Timor-Leste tanba daudaun ne’e internet iha Timor-Leste ladún la’o ho di’ak.

Tuir investimentu ne’ebé SACOMTEL halo, konesaun kabel hosi Singapura mai Timor-Leste ho osan hamutuk rihun $800 no prosesu hotu iha Timor-Leste, SACOMTEL bele gasta to’o millaun $1-resin.

Notísia relevante: Governu lansa ”fiber optic” iha 23 novembru, kabu tama uluk Bebonuk

Jornalista: Hortencio Sanchez

Editór : Florencio Miranda Ximenes

iklan
iklan

Leave a Reply

iklan
error: Content is protected !!