Governu prevee rihun $50 ba konstrusaun mini merkadu ikan iha Tíbar
DILI, 12 Abríl 2024 (TATOLI) – Ministériu Agrikultura, Pekuária, Peska no Floresta (MAPPF) prevee rihun $50 ba konstrusaun mini merkadu ikan iha área Tíbar atu fasilita negosiante sira fa’an sira-nia ikan iha fatin ida seguru.
Sekretáriu Estadu Peska, Domingos dos Santos, informa katak mini merkadu ne’e sei harii iha tinan ne’e hodi responde ba ezijénsia komunidade nian ba kriasaun fatin ne’ebé sei kompleta ekipamentu ne’ebé adekuadu.
“Fatin atu konstroi mini merkadu ne’e identifikadu ona no parte Ministériu mós halo ona koordenasaun ho autoridade sira iha área referida. Autoridade sira aseita hotu ona kona-ba fatin konstrusaun mini merkadu ikan ne’ebé nia prosesu ba oin hein de’it rezultadu serbisu husi ekipa téknika sira ba levantamentu dadus rai nian, nune’e ministériu bele prepara dezeñu. Kuandu serbisu ne’e maka lalais, fiar katak fulan-Jullu ne’e bele aselera ona ninia prosesu konstrusaun”, dehan.
Aleinde ne’e, iha mós planu seluk ne’ebé ministériu prepara atu halo reabilitasaun ba mini merkadu ikan iha Taibessi ne’ebé antes ne’e harii ona, maibé tanba laiha manutensaun ba merkadu ne’e, entaun enfrenta problema tanba ekipamentu sira ne’ebé maka instala iha laran hanesan konjeladór atu asegura ikan la funsiona.
“Ita-nia diresaun halo ona identifikasaun iha fulan kotuk no agora hein de’it ita hatama iha planu atu tau mós orsamentu ba prosesu reabilitasaun sira”, realsa.
Negosiante ikan iha merkadu Taibessi, Gaspar Gama, haktuir katak, antes ne’e, Governu prepara ona mini merkadu hodi apoia sira fa’an ikan nune’e labele estraga. Mini merkadu ne’e kompleta ho konjeladór tolu boot hodi konserva ikan sira, maibé presiza hetan manutensaun tanba labele uza ona.
“Sasán ne’ebé Governu apoia ona nia jestaun ami rasik maka halo. Tanba ami mak hetan rendimentu husi fatin ne’e, maibé tanba ami la halo jestaun di’ak, entaun fasilidade sira ne’e avaria hotu”, lamenta.
Nia salienta katak Ministériu Agrikultura halo ona levantamentu dadus iha fulan kotuk atu hadi’a fali mini merkadu ne’e no espera katak sira bele fali organiza fali fatin ne’e ba negosiante sira hdoi uza fali.
Nia mós husi ba ministériu bainhira reabilita ona fatin ne’e tenke koloka ekipa ida hodi halo kontrola ba ekipamentu sira, nune’e garante nafatin iha kondisaun di’ak.
Jornalista: Tomé Amado
Editora: Maria Auxiliadora
