DILI, 15 abríl 2024 (TATOLI)–Primeiru-Ministru (PM), Kay Rala Xanana Gusmão, hamutuk ho delegasaun, iha domingu (14/04) ne’e, kontinua viajen husi Reinu Unidu bá país Grécia hodi partisipa iha konferénsia oseanu, iha kapitál Atenas.
Embaixadór Timor-Leste iha Brusselas, Jorge Trindade Camões, akompaña husi Diretora Nasionál Ministériu Negósiu Estranjeiru no Kooperasaun (MNEK) iha Europa no Áfrika, Josefina Tilman, simu Xefe Governu no delegasaun iha Aeroportu Internasionál Atenas.
“Deskansa tiha minutu balun, Embaixadór Jorge no Diretora Josefina atualiza ajenda kona-ba konferénsia Oseanu ba dala-sia, ne’ebé sei hala’o iha Grécia, iha loron 14 to’o 18 abríl 2024,” refere nota ne’ebé Agência Tatoli asesu, segunda ne’e.
Notísia relevante : PM Xanana lansa podcast ‘The Citizen’s Connection’ fasilita informasaun bá Timoroan iha Reinu Unidu
PM Xanana reprezenta Prezidente Repúblika, José Ramos-Horta ne’ebé simu konvite husi Primeiru-Ministru Grécia, Kyriakos Mitsotakis, hodi hato’o pozisaun Timor-Leste iha konferénsia Oseanu.
Eventu ne’e sei hala’o iha salaun kovensaun King Hussein Bin Talal, Hilton Dead Sea, Atenas, ne’ebé partisipa husi Xefe Estadu no Xefe Governu, inklui organizasaun internasionál sira hodi hato’o sira-nia hanoin durante konferénsia hodi serbisu hamutuk proteje tasi ne’ebé moos no saudável.
Eventu internasionál ne’e sei deskute temátika importante sira hanesan hametin kooperasaun serbisu hamutuk atu proteje tasi, deskute kontinuasaun kooperasaun ba ekonomia azul, mudansa klimátika, seguransa ba marrítima, kontrolu no kuidadu tasi ne’ebé moos no asuntu seluk tan.
Primeiru-Ministru, Kay Rala Xanana Gusmão, sei hato’o mós palestra hamutuk ho bainaka impotante sira hanesan Primeiru-Ministru São Tomé Príncipe, Patrice Emery Trovoada, Primeiru-Ministru Cabo-Verde, Ulysses Correia e Silva no seluk tan.
Jornalista : Antónia Gusmão
Editora : Julia Chatarina
