DILI, 16 Abríl 2024 (TATOLI) – Ministériu Agrikultura, Pekuária, Peska no Floresta (MAPPF) no Komandu Polísia Marítima iha Covalima halo konkordánsia hodi utiliza ró peska neen ne’ebé disponibiliza ona ba peskadór sira hodi kontrola atividade peska ilegál.
Sekretáriu Estadu Peska, Domingos dos Santos, hateten Timor-Leste daudaun hasoru peskadór ilegál ne’ebé mai husi nasaun viziña, tanba ne’e atu evita ema labele halo peska ilegal maka ministériu halo liña koordenasaun ho Komandu Polísia Marítima Covalima hodi fasilita mós ró peska bá halo kontrolu peska ilegál iha tasi Timór.
“Ita hasoru duni problema iha atividade peska ilegál sira, tanba iha ita-nia maluk sira husi nasaun viziña maka tama ona mai ita-nia territóriu tasi hodi halo atividade peska ba ita-nia rikusoin tasi laran”, Sekretáriu Estadu dehan iha Comoro, ohin.
Ró ne’ebé ministériu garante ba Komandu Polísia Marítima Covalima ne’e entrega ona ba grupu peskadór sira iha munisípiu referidu iha fulan-Marsu, tanba ne’e parte rua tenke koordena malu hodi halo jestaun di’ak, nune’e bele uza ró ne’e hodi hala’o atividade peska no kontrolu.
“Ita promete kedan katak ró ne’e la’ós fó de’it ba grupu peskadór sira, maibé bainhira Polisia Marítima sira presiza, ita tenke oferese ba sira atu hala’o serbisu hodi kontrola ema ne’ebé tama ilegál mai foti ita nia rekursu sira iha tasi”, dehan.
Atu kombate peska ilegál ne’e iha mós alternativa importante seluk maka parte Ministériu Agrikultura halo ona diskusaun ruma ho nasaun viziña Austrália, Indonézia no Papua Nova-Giné kona-ba importánsia atu evita peska ilegál iha nasaun haat ne’e. Nasaun tolu ne’e sei hamutuk ho Timor-Leste atu realiza enkontru ministerial iha fulan-Maiu ne’e hodi diskute tékniku sira kona-ba prevensaun peska ilegál sira.
“Husi nasaun tolu ne’e, ita mak viziñu ho sira entaun ita husu ba sira atu hamutuk ho ita hodi bele kombate atividade peska ilegál iha ita-nia tasi”, esplika.
Xefe grupu peskadór husi Covalima, Lionel Amaral, haktuir katak sira hetan ona apoiu ró ida husi Ministériu Agrikultura. Ró ne’e sira uza ba atividade peska hodi buka lukru hodi sustenta nesesidade família nian, mibé ró ne’e sei fasilita mós polísia sira kuandu presiza atu halo kontrola iha tasi.
“Ita sei la uza fasilidade ró ne’e mesak de’it, tanba ita mós iha Polisia Marítima ne’ebé presiza ekipamentu sira atu halo kontrolu. To’o agora sira seidauk uza no espera katak bainhira sira presiza ita sei fasilita ba sira”, realsa.
Notísia relevante: Grupu agrikultór no peskadór iha Covalima simu tratór haat no ró neen husi MAPPF
Jornalista: Tomé Amado
Editora: Maria Auxiliadora
