iklan

BOBONARO, MUNISÍPIU

Estrada Mazop no Laho sei konstrui iha tempu basik

Estrada Mazop no Laho sei konstrui iha tempu basik

Kondisaun atuál estrada iha aldeia Oepho, suku Tapo, postu administrativu Bobonaro, munisípiu Bobonaro. Imajen espesiál.

BOBONARO,17 abríl 2024 (TATOLI)-Diretór Servisu Munisipál Obra Públika, munisípiu Bobonaro, Marcelino Gonsalvez Godinho, informa estrada rurál iha aldeia Mazop liga ho aldeia Laho, suku Ai-asa, postu administrativu Bobonaro nian sei konstrui iha tempu basik liu hosi Programa Dezenvolvimentu Intregadu Munisipál (PDIM) 2024.

Nia dehan, prosesu kona-ba konkursu públiku ba projetu kontrusaun estrada rurál iha aldeia rua ne’e oras ne’e, tama ona iha faze finál tanba sei hein mak atu anúnsia reultadu konkursu ne’e ba publiku atu nune’e bele hahú ona implementa projetu ne’e iha tempu besik.

Notísia Relevante:Abitante Mazop-Laho halerik ba eletrisidade no saúde

“La kle’ur tan loron ida rua taka ona rezultadu atu nune’e ita bele hetan ona kompañia vensedór atu ezekuta projetu ne’ebé oras ne’e povu hein hela,” nia informa ba jornalista sira iha edifísiu Kámara Ekleziastíka Dioseze Maliana, kuarta ne’e.

Antes implementa projetu ne’e, nia hateten nia parte sei komunika ho empreza konstrutora atu koopera no koordena ho lidér komunitária nune’e obra ne’e bele la’o tuir kontratu  tanba projetu ne’e sei implementa durante tinan ida-resin no mós hatudu kualidade di’ak iha ninia ezekusaun projetu.

“Karik nia rezultadu implementasaun ba projetu ida ne’e mak la di’ak, nia tenke simu konsekuénsia hanesan blacklist, atu nune’e tinan tuir mai nia bele prosesu ida ne’e, ita nu’udar timoroan husu ba empreza ne’ebé hetan fiár atu fó kontribuisaun ba ita-nia dezenvolvimentu iha ita-nia munisípiu Bobonaro,”Tenik nia

Iha parte seluk, Xefe Suku Aiasa, Juvinál Moniz Martins Marques, agradese ba governu maibe husu governu lokál atu aselera prosesu konkursu públiku ne’e tanba projetu ne’e komunidade hein kle’ur ona.

“Ne’e para tempu bailoron tinan ida ne’e bele implementa ona nune’e ita-nia komunidade iha aldeia Mazop bele halo movimentu ba mai no mós lori sira-nia produtu lokál iha tempu udan livremente bele asesu ona ba estrada,”nia hateten.

Lider komunitária suku Aiasa ne’e mos rekomenda ba Ministeriu Obra Publika atu konstrui tan ponte ida iha aldeia Mazop no Laho.

“Hau hatene iha tempu udan komunidade Mazop ho Laho susar tebes atu lori sira-nia produtu lokál ba merkadu iha postu Bobonaro,sira paradu la halo movimentu tanba kestaun estrada ho ponte,” nia relata tan.

Entretantu,  liuhosi Programa Dezenvolvimentu Intregadu Munisipál (PDIM) 2024, implementa hela projetu estrada rurál bá iha Ualgomo no Odelgomo suku Ai-asa nian.

Notísia Relevante:Autoridade Bobonaro sei implementa projetu PDIM 13

Jornalista: Sergio da Cruz
Editór: Agapito dos Santos

iklan
iklan

Leave a Reply

iklan
error: Content is protected !!