DILI, 18 abríl 2024 (TATOLI) – Inspesaun Jerál jogu (IGJ) hamutuk ho Autoridade Munisípiu Dili no Autoridade Seguransa divulga rezolusaun Governu númeru 14/2024, 20 marsu kona-ba suspensaun temporária ba atividade jogu bola guling iha Timor-Leste ba Adminsitradór Postu, Xefe Suku, Xefe Aldeia sira iha Munisípiu Dili.
“Atividade ida-ne’e ho objetivu atu konitnua ezekuta rezolusaun Governu númeru 14/2024, 20 marsu nian, iha ne’eba programa ida ne’ebé ami halo ne’e mak divulgasaun informasaun kona-ba suspensaun temporária ba atividade jogu bola guling iha Timor-Leste ba autoridade sira iha Dili”, Inspitór Inspesaun Jerál Jogu, Anibal Carvalho Martins, dehan ba jornalista sira iha AMD Matadoru, ohin.
Nia dehan, divulgasaun informasaun ida-ne’e ba autoridade sira, rezolusaun ne’e vigór ba kualker atividade bola guling, tantu ida ne’ebé mak ho karater permanente no mós ida ne’ebé mak ilegál.
“Ita hamutuk hotu iha fatin ida-ne’e atu rona no halo tuir tanba ita boot xefe suku sira mak ukun direta povu sira iha baze, ita boot sira mak hanesan liman ain ba Governu nian, tun ba kraik atu transmite nafatin rezolusaun ne’e to’o iha ne’eba atu populasaun sira kumpre”, nia esplika.
Anibal informa, mate-uma sira halo tratamentu normál hanesan uluk hader, reza no halo animasaun sira seluk labele, hanesan loke bola guling iha ne’eba tanba Governu bandu ona.
“Iha oportunidade ida-ne’e atu hateten katak di’ak liu ita-nia bairo hanesan família ruma mate, ita halo tratamemtu normál hanesan uluk, ita bele ba hader no reza hodi halo animsaun sira seluk ne’ebé mak tuir tradisaun timor nian, maibé ita evita tiha atividade bola guling ida-ne’e tanba Governu bandu ona”, nia relata.
Tanba ne’e, inspitór jogu halo ona karta ba operadór bola guling sira atu taka sira-nia atividade hodi hein Governu atu loke fila fali.
“Ami halo karta ba operadór bola guling sira atu taka sira-nia atividade iha mate uma no iha fatin públiku sira, ita taka provizóriu hodi hein bainhira mak Governu hakarak atu loke fila fali. Ba operadór bola guling sira ne’ebé mak antes selu ona taxa ba Governu, ita suspende hotu depois hein prosesu tuir mai tanba desizaun sai ona no ita tenke halo tuir”, nia haktuir.
Nia aborda, atividade bola guling iha Dili no munisípiu sira balun hetan ona lisensa hosi Governu ne’ebé bolu karater permanente maibé rezolusaun sai tenke taka provizióriu no sira ne’ebé mak la hetan lisensa ka illegál, operasaun la’o hela, tanba inspesaun jerál jogu servisu hamutuk ho PNTL, PCIC halo operasaun kalan iha Dili laran hodi identiifka atividade sira ne’ebé mak la’o hela iha komunidade nia leet liuliu mate uma, banhira hetan kaer operadór sira, PCIC no PNSIC detein sira hodi lori ba halo investigasaun no preende sira-nia sasan hanesan meza, bola, osan hodi lori ba prosesu investigasaun.
“Se karik rezolusaun ne’ebé sai ona mak sira halo atividade bola guling nafatin, sansaun ne’ebé ita fó mak hanesan entrega ba PNTL, PCIC, PNSIC, sei halo prosesu investigasaun no ikus mai bele hetan pena ka hetan kastigu. Tanba atividade ida-ne’e ita la fó koima, se ita fó multa bainhira atividade ne’e hetan lisensa maibé nia viola regra lisensa, agora rezolusaun sai ona ida-ne’e sei la hetan multa maibé tenke pena”, nia relata.
Iha fatin hanesan, Autoridade Munisípiu Dili, Grigorio Saldanha, husu ba autoridade sira hanesan lideransa komuntária atu implementa no halo tuir rezolusaun Governu nian ne’ebé mak fó sai ona atu taka provizóriu bola guling iha TL.
“Mate uma mak dala barak loke atividade bola guling ida-ne’e, maibé Governu fó sai rezolusaun no bandu tenke halo tuir ida-ne’e mezmu temporaria”, Saldanha husu.
Diretór Polísia Sientífika Investigasaun kriminál Vicente Fernandes Brito, husu ba Inspetór Jerál Jogu atu aplika rezolusaun ida-ne’e ba munisípiu sira, labele iha Dili de’it no tenke halo mós avaliasaun tuituir atu ema labele joga bola guling iha TL.
“Ha’u sujere ba Inspetór atu propoin ba ita-nia Governu ba prioriedade sira hanesan halo avaliasaun ba suspensaun temporária no mós haree nia dezafiu, progresu no efeitu sira”, Vicente Fernandes Brito afirma.
Tanba ne’e, Brito husu ba administradór, xefe suku, xefe aAldeia sira mak banhira haree ema loke bola guling, ita boot sira-nia obrigasaun atu informa ba autoridade kompotente sira, se ita boot sira mak la informa no la koopera mak ita boot sira mós kontribui ba jogu sira-ne’e.
Xefe Suku Fatuhada, Marcelino Soares, agradese ba Governu tanba bele taka provizóriu bola guling iha Timor-Leste.
“Taka bola guling, ida-ne’e bele hakman ami-nia servisu, tanba mosu krime oioin iha atividade refere maibé, ami haree katak ida-ne’e di’ak atu labele hamosu krime iha ne’eba no fatin sira hotu”, Marcelino konklui.
Jornalista : Felicidade Ximenes
Editór : Zezito Silva
