iklan

ERMERA

Servisu Agrikultura Ermera menus extensionita no tratór

Servisu Agrikultura Ermera menus extensionita no tratór

Diretór Servisu Agrikultura Munisipiu Ermera, Marcos Martins. Imajen/Espesiál.

ERMERA, 20 abríl 2024 (TATOLI)—Diretór Servisu Agrikultura Munisipiu Ermera, Marcos Martins, rekoñese problema menus extensionista no tratór nafatin sai difikuldade ba Servisu Agrikultura Ermera  hodi fasilita servisu to’o baze.

“Ami rekoñese, extensionista iha terrenu ne’e ladún forte tanba menus ladún kompletu. Entaun, ami hanoin iha 2025 ne’e, ami hakarak prrienxe suku sira-ne’ebé laiha extensionista atu nune’e bele mellora didi’ak servisu produsaun agrikola ne’e iha terenu di’ak liután,” Diretur Marcos hateten ba jornalsita sira iha edifísiu Servisu Agrikultura Agrikultura Ermera, sesta ne’e.

Totál exetnsionista iha Ermera daudaun ne’e hamutuk 27 ho totál suku iha Ermera ne´e hamutuk suku 52, ho kada extensionista bele responsável ba suku rua ka tolu iha postu administrativu lima ne´ebé iha Ermera.

“Ita-nia lista grupu ne’e 125 mak eziste hela. Iha postu lima ne’e iha hotu. Kada extensionista iha grupu haat. Suku iha ne’e 52, extensionista iha ne’e 27 de’it. Kada suku, ita hakarak iha extensionista ida, daudaun ne’e extensionista ida bele kobre suku 2 ou 3, tanba ne’e difikulta sira-nia servisu. Dalaruma ema ida labele kobre area barak, ida-ne’e mak ami-nia difikuldade,” nia esplika.

Servisu Agrikultura Ermera liuhusi extensionista sira durante ne’e ativu apoiu grupu sira-ne’ebé eziste ona ho tipu atividade hanesan haki’ak manu, kuda hare, batar, haki’ak ikan, ortikultura no seluk tan.

Diretór ne’e iha ona hanoin katak aktividade hotu-hotu ne’ebé mak iha terrenu liuliu ba agrikultura, joventude sira sei buka tempu ida atu halo enkontru ho sira oinsá mak servisu hamutuk iha future, iha kualker área hodi bele atinje meta dezenvolvimentu 2030.

Iha Servisu Agrikultura Munisipiu Ermera ne´e, nia dehan, iha tratór hamutuk 13 maibé tratór 10 daudaun ne´e avaria totál, ho nune’e labele fasilita servisu ne’ebé másimu ba agrikultór sira iha munisipiu Ermera.

“Iha ami-nia fatin kuaze tratór maiória avaria. Ita iha tratór 13, ha’at (4) ne’e iha Sare, sia (9) iha Ermera. Iha Sare ne’e avaria totál. Agora, iha munisípiu ne´e iha tratór neen (6) avaria, hela tolu mak halo servisu maibé ladún masimu. Ita ita hanoin atu halo manutensaun ba tratór hirak ne’e,” nia hateten.

Problema seluk, nia dehan, konvustível hodi ense ba tratór kuandu mai tarde husi nasional, servisu agrikultura munisipál sei husu ba agrikultór sira hodi ense mina rasik liuhusi asina akta konkordánsia.

Tuir dadus husi Ministériu Finansa, Orsamentu Jeral Estadu (OJE) ne’ebé aloka ba setór agrikultura aumenta tuir tinan ida ba tinan ida seluk mak hanesan iha OJE 2022 hamutuk $34.214.392, OJE 2023 hamutuk $43.299.389 no OJE 2024 ne´e aloka $48.933.994.

Jornalista : Cidalia Fátima

Editór       : Cancio Ximenes

iklan
iklan

Leave a Reply

iklan
error: Content is protected !!