Reabilitasaun estrada Quelicai ameasa uma-lisan ualu
BAUCAU, 22 abríl 2024 (TATOLI) – Prosesu reabilitasaun estrada iha área postu administrativu Quelicai to’o Suku Nahareca, postu Ossu, munisípiu Viquque fo ameasa uma-lisan ualu hetan estragus.
Administradór Postu Administrativu Kelikai, Paulo Jacinto Morreira, esplika, uma-lisan ualu referida iha suku rua hanesan aldeia Mumana, suku Abafala no aldeia Laualiu, suku Baguia ne’ebé prosesu reabilitasaun fo impaktu rai halai hodi ameasa uma-lisan hirak-ne’e atu estragus.
“Prosesu reabilitasaun nee la’o di’ak, maibé daudaun nee fó impaktu ba uma lisan sira ami identifika ualua, tanba udan maka’as loron hira ba kotuk rai monu nia impaktu ba ba komunidade nia uma lisan neebe iha foho leten,” Administradór postu Quelicai hateten Vila Antiga, segunda ne’e.
Autoridade postu esforsu ona halo aprosimasaun ho parte responsável kompañia ba projetu referedu hodi fó atensaun ba rai-lolon ne’ebé komunidade hela ba tuir dezeñu Bill of Quantity hanesan kuda ai-oan hodi no konstrui moru protesaun liuliu proteje uma-lisan ualu.
Paulino Morreira mos hato’o ba governu liuhosi Mininstériu Obra Públika (MOP) atu atensaun ba asuntu refere, tanba antes ne’e komunidade sira dirije ona karta ba nasionál atu orienta ekipa tékniku sira halo observesaun ba fatin sira buka solusaun.
“Semana ida ne’e tán mak udan maka’as nafatin bele afeita ba uma-lisan sira-ne’e,” Paulino Morreira akresenta.
Maske estrada referida bainhira remata reabilitasaun sei fo benefísiu ba komunidade, maibé komunidade balun iha posibilidade sai vítima, tanba bele lakon uma kulturál, bainhira la konstrui moru protesaun iha fatin afetadu sira.
Reabilitasaun estrada iha postu Quelicai to’o Nahareca, postu Ossu ho distánsia kilómetru 22.7 ho luan metru 7, kompostu hosi aspál metru 4, alargamentu metru 1 no ombru metru rua, moru protesaun, sinál tránzitu no kuda ai-oan ba fatin risku.
Durasaun ba reabilitasaun estrada ho durasaun fulan-18 responsabiliza hosi kompañia Chongqing Internasional Constraction ho totál orsamentu hamutuk $ 452.122,00.
Jornalista : Natalino Belo
Editór : Rafael Ximenes de A. Belo
