ERMERA, 25 abríl 2024 (TATOLI) – Prezidente Autoridade Munisípiu Ermera, Jose Martinho do Santos Soares, dehan merenda eskolár iha Munisípiu Ermera implementa ona ba eskola agrupamentu hamutuk 43.
“Ita-nia merenda eskolár iha Munisípiu Ermera implementa ona iha trimestre daruak ba eskola agrupamentu hamutuk 43 ne’ebé eziste iha ne’e”, Jose Martinho do Santos Soares informa ba TATOLI iha Edifísiu Autoridade Munisípiu Ermera, ohin.
Nia dehan, Munisípiu Ermera, iha tinan ida-ne’e, aloka orsamentu ba merenda eskolár hamutuk millaun rua-resin.
“Iha tinan ida-ne’e, Munisípiu Ermera aloka orsamentu ba merenda eskolár hamutuk millaun rua-resin ne’ebé mak ita iha, entaun eskola sira ne’e sira-nia proposta transferénsia ami halo hotu ona, depende variedade eskola balun iha estudante barak, entaun hetan barak iha eskola balun estudante uitoan, entaun hetan oituan”, nia esplika.
Autoridade ne’e afirma katak merenda eskolár iha Ermera laiha problema, tanba ne’e ba oin sei la’o ho di’ak.
“Iha Munisípiu Ermera merenda eskolár laiha problema, ha’u espera katak ami-nia implementasaun ida-ne’e sei la’o ho di’ak”, nia haktuir.
Nia aborda, Ministériu Edukasaun fó ona orientasaun ba kada eskola sira oinsá prepara menú ba estudante sira, entaun menú ne’ebé sira utiliza mak produtu ne’ebé komunidade sira kuda iha toos laran.
“Ministériu Edukasaun fó ona orientasaun oinsá prepara menú ba ita-nia oan sira atu konsumu, entaun orientasaun ba suku no postu sira katak, tenke aproveita ai-han lokál sira, ezemplu tomate ne’ebé mak kuda iha ita-nia toos rasik, aifuan sira ne’ebé mak ita kuda iha toos rasik, ikan ka naan ne’ebé ita iha, ho ida-ne’e osan tama ba iha ita-nia komunidade sira, entaun éezijensia boot mak tenke aproveita produtu ne’ebé mak ita-nia komunidade sira kuda, ida-ne’e mak ita hakarak”, nia akresenta.
Tanba ne’e, merenda eskolár, Governu fó liu hosi jestaun iha munisípiu atu hadia nutrisaun oan sira-nian, atu sira bele iha kondisaun di’ak no aproveitamentu di’ak ba futuru.
“Ita-nia orientasaun mak tenke aproveita tein ai-han lokál sira, ita halo hanesan ne’e atu osan sira ne’e bele fila fali ba komunidade, lae osan sira ne’e sai hotu ba liur, ida-ne’e mak ita halo hela esforsu hamutuk ho Ministériu Agrikultura no Peska inklui seguransa alimentár sira, NGO, suku sira, saúde no edukasaun, ita hotu servisu hamutuk atu nune’e bele orienta ita-nia komunidade atu fornese ai-han lokál sira, entaun ida-ne’e mak ita daudaun ne’e la’o hela”, nia subliña.
Iha fatin hanesan, Diretór Servisu Edukasaun Munisípiu Ermera, Francisco Marto de Araujo, hateten iha Munisípiu Ermera hahú implementa ona merenda eskolár ba estudante sira ho kritériu ne’ebé iha katak tenke tuir menú ne’ebé fó hanesan, tenke tein ho produtu lokál sira ne’ebé mak iha, labele tein uza ai-han importadu sira.
“Merenda eskolár ne’e, ita hahú implementa iha loron 22 abríl, entaun ha’u bele dehan katak eskola hotu merenda eskolár la’o ona, entaun ita hein de’it ita-nia monitorizasaun ba implementasaun sira hodi haree ba nia kritériu sira ne’ebé ita fó ne’e di’ak ka lae, hanesan iha área eskola sira, ijiene di’ak ka lae, depois menú ne’ebé fó ne’e tuir duni ka lae, entaun se ida ne’e mak di’ak ona ita kontinua ba oin”, Francisco Marto de Araujo konklui.
Jornalista : Felicidade Ximenes
Editór : Zezito Silva
