Autoridade Baucau husu komunidade labele konstrui uma iha natar
BAUCAU, 23 abríl 2024 (TATOLI) – Autoridade Administrasaun Munisipál Baucau husu komunidade labele konstrui uma iha natar laran tanba konsidera fo impkatu ba setór produsaun agrikola.
Prezidente Autoridade Munisipiu (PAM) Baucau, Veneranda Eurico Marques Lemos Martins, sei orienta Autoridade Postu Administrativu no Suku halo aprosimasaun ba komunidade sira, tanba politika governu halo esforsu ba setór agrikultura hanesan planu konstrui kanál irrigasaun hodi fornese bee ba natar abandonadu sira iha territóriu inklui Baucau.
“Bandu sim, maibe atu hasai ha’u sei ko’alia ho Administrador Postu no Xefe Suku halo aprosimasaun ba entidades ne’ebe lakohi kontribui atu hasa’e produsaun agrikola,” Prezidente Autoridade Munisipiu Baucau hateten Vila Nova, tersa ne’e.
Eis deputadu ne’e, argumenta, natar nu’udar área importante nune’e presiza proteje nune’e futuru bele hasae númeru produsaun agrikola nian iha rai laran inklui bele hapara importasaun foos husi rai-liur.
“Ita seidauk tama iha integradu produsaun nian mak sente ladiak mai ita, mais iha laran, ita hotu sei hakarak halo natar, tanba fo benefisiu,” Veneranda Lemos akresenta.
Xefe Suku Buruma, Liborio dos Santos Freitas, preukupa ho komunidade sira iha Suku Buruma balun hahu ona konstrui uma iha natar laran tanba labele utiliza ona hodi halo natar no sei kontribui hamenus produsaun.
“Jatamente bainhira natar ita halo fali uma iha laran, nia sei fo impkatu ba produsaun, tanba labele halo produsaun ona iha laran,” Liborio Freitas hateten.
Entretantu iha munisípiu, komunidade iha área suku Vemasse tasi, Buruma, Seisal to’o Mulia kauze hahú konstrui uma iha natar ne’ebé konsideradu nu’udar fatin potensiál ba setór agrikola.
Munsípiu Baucau rasik nu’udar produtór ba produtu hare ho totál ektares 14.423 iha postu administrativu neen liuliu maioria iha postu Vemase, Baucau Vila, Baguia no Venilale.
Jornalista : Natalino Belo
Editór : Rafael Ximenes de A. Belo
