Merenda eskolár iha Baucau sei hahú iha maiu
BAUCAU, 23 abríl 2024 (TATOLI) – Servisu Munisipál Edukasaun Baucau sei hahú implementa programa merenda eskolár iha inisiu fulan-maiu.
Diretor Servisu Munisipál Edukasaun Baucau, Afonso dos Santos Freitas, esplika, programa referida hahú tarde tanba alokasaun orsamentu tarde nune’e Edukasaun Baucau trasa kalendáriu tentativa iha inísiu fulan-maiu ne’ebé benefisiáriu mai hosi estudante pre-eskolár no ensinu báziku primeiru to’o terseiru siklu.
“Tuir planu fulan-maiu ne’e, kuandu orsamentu tama hotu ona iha Ekipa Jeataun Programa-Merenda Eskolár sira-nia konta bankária,” Diretór Servisu Munisipál Edukasaun Baucau hateten iha Vila Nova, tersa ne’e.
Menu prioridade ba merenda eskolár sei foka liu ba produtu lokál, komposta hosi hahaan nutrisaun, haforsa no haburas, ne’ebé lista aprova ona hosi Ministériu Edukasaun.
Edukasaun Baucau husu grupu EJP-merenda eskolár hamutuk 35 sira ne’ebé asina ona akordu atu kontrola masimu ba ezekusaun orsamentu nune’e labele mosu problema liuliu ba menu hahan.
“Husu Ekipa Jestaun Programa sira prepara nunee bainhira orsamentu tama ita hahu ona implementa programa merenda eskolá,” Afonso Freitas akresenta.
Hosi totál grupu EJP-merenda eskolár hamutuk 35, sei estabelese dapur hamutuk 181 nune’e grupu 21 mak iha ona alokasaun orsamentu no hela grupu 14 mak sei iha faze prosesu ne’ebé tuir planu finaliza iha fulan-ne’e.
Programa Merenda Eskolár tinan-ne’e iha munisípiu Baucau sei implementa fazeadamente ho tótal orsamentu hamutuk millaun $ 2.98 hosi tótal benefisiáriu hamutuk rihun 20-resin komposta hosi estudante pre-eskolár no ensinu báziku ho totál eskola hamutuk 58.
Jornalista : Natalino Belo
Editór : Evaristo Soares Martins
