DILI, 29 abríl 2024 (TATOLI) – Ministériu Turizmu no Ambiente liuhosi Diresaun Nasionál Emprendimentu Atividade Produtu no Turístiku fó formasaun ospitalidade ba jestór otél, resturante no kafetaria durante loron tolu ho objetivu atu hasa’e kualidade atendimentu ba kliente sira.
“Ita fó formasaun ba jestór kafetaria, otél sira no restaurante iha Dili, durante loron tolu, nune’e sira bele hatene kona-ba oinsá atende ba ema kliente sira banhira ba iha sira-nia fatin”, Diretora Nasionál Emprendimentu Atividade Produtu Turístiku, iha Ministériu Turizmu no Ambeinte, Maria Ernestina Lopes, informa iha Hotel Timor, ohin.
Nia dehan, formasaun ospitalidade ida-ne’e ho objetivu atu hasa’e koñesimentu ba setór privadu sira. Programa ne’e destinadu ba jestór resturante, otél no kafetaria sira atu sira bele hatene no jere atendimentu iha sira-nia fatin.
“Hosi treinamentu ida-ne’e importante tebes ba na’in otél sira, restaurante no kafetaria atu sira bele hatene no jere sira-nia servisu liuliu oinsá atende kliente sira atu mai”, nia afirma.
Nia firma, formasaun ne’e durante loron tolu, ho totál partisipante hamutuk liu 80.
“Daudaun ita halo formasaun iha Dili no tempu badak sei ba hotu munisípiu, nune’e jestór sira bele hatene oinsá halo atendimentu ba kliente sira banhira ba sira-nia fatin”, nai relata.
Dirasaun Nasionál Emprendimentu Atividade Produtu no Turístiku rejista otél, restaurante no kafetaria iha Timor-Leste hamutuk liu 900.
Iha fatin hanesan, Inspetór Jerál Turizmu no Ambiente, Rogerio Gonzaga Martins, agradese tanba partisipante sira bele hetan buat ruma ne’ebé di’ak hodi bele ba implementa iha sira-nia servisu fatin.
“Formasaun ida-ne’e, ita boot sira tenke aprende buat ruma iha ne’e, nune’e bele implementa iha ita boot sira-nia fatin”, Rogerio Gonzaga Martins revela.
Nia haktuir, hanesan Inspetór Jerál Auditoria Finanseira no Investigasaun, husu ba na’in ba otél, kafetaria no restaurante katak lisensa kuandu mate, tenke halo moris fila fali, atu atividade sira ne’e nafatin la’o ba oin.
“Ha’u husu ba jestór otél, restaurante no kafetria sira nafatin halo kooperasaun, espesialmente enkuadramentu legal, atu bele halo atividade nafatin”, nia relata.
Diretora ba Empreza Elvitridariu Uni pesoál Lda, Rosalia Elvi Madiana Jose Trindade, dehan formasaun ba ospitalidade ida-ne’e importante atu jestór sira bele halo jestaun rekursu hodi bele fó atendimentu ba kliente sira ho kualidade.
“Ami agradese ba Governu tanba formasaun ida-ne’e hasa’e ami-nia kapasidade atu oinsá halo atendimentu ba kliente sira ne’ebé mak mai, entaun husi formasaun ida-ne’e banhira ami ba fali ami-nia fatin hodi hato’o ba funsionáriu sira, tanba sira mak ema dahuluk hodi atende kliente, entaun ami bele fó fila fali ami-nia esperiénsia ne’ebé mak ami aprende iha formasaun ida-ne’e”, Rosalia hateten.
Restaurante Elvis Metiaut rejistu iha 2018, fulan-Marsu no funsionáriu feto hamutuk 12 no mane na’in-ualu.
Jornalista : Felicidade Ximenes
Editór : Zezito Silva
