Dili Jazz Festival: Promove pás, direitu umanu no troka kultura
DILI, 30 abríl 2024 (TATOLI) – Komisaun Organizadora hosi Art Emprender hamutuk ho Uma Amérika selebra Loron Internasionál Jazz ne’ebé monu iha loron 30 fulan-Abríl ne’ebé mundu tomak komemora ho tema promove pás, direitu umanu no troka kultura.
“Eventu ne’e ninia objetivu mak atu hasa’e kreatividade setór kulturál nian atu jerasaun foun sira bele hetan esperiénsia iha jéneru múzika ida-ne’e no iha promosaun direitu umanu, pás, fraternidade no troka kultura, tanba festa ne’e selebra iha nasaun 190 iha mundu tomak, inklui Timor-Leste”, Komisaun Organizadora Kay Limak, hateten iha Fundasaun Oriente, ohin.
Nia informa, festival ne’e mós ho objetivu atu fó inspirasaun ba jerasaun atuál sira nu’udar ajente ho mensajen kona-ba pás, esperansa no progresu sosiál ne’ebé artista sira hato’o, ho rekoñesimentu ba jazz nu’udar meiu ba dezenvolvimentu interkámbiu kulturál, edukasaun, kreativu, jéneru no diálogu artístiku.
Loron Internasionál Jazz selebra tinan-tinan iha loron 30 abríl, loron ne’ebé UNESCO fó sai iha tinan 2011, hatudu importánsia husi jéneru múzika ida-ne’e nu’udar forma espresaun artístika ne’ebé promove diálogu interkulturál no respeitu ba malu.
“Eventu ne’e la’ós de’it ko’alia kona-ba rikusoin no variedade jazz nian, maibé enkoraja mós partisipasaun ativu husi foin-sa’e timoroan sira hodi promove pás, diversidade artístika no kulturál.
Iha fatin hanesan, Voluntária Uma Amerika, Febriela Joyce, hateten selebrasaun ba Loron Internasionál Jazz ne’e iha esposizaun no konsertu sira ne’ebé hahú horsida kalan iha fundasaun oriente.
“Iha selebrasaun ne’e ita loke espozisaun no mós konsertu hodi komemora tinan 30 abríl ba loron festival jazz”, Febriela Joyce esplika.
Iha Timor-Leste, halo selebrasaun ba dala hitu husi festival ne’e mak komisaun organizadora konvida grupu nasionál haat hanesan, UAV24 Band, Key Word, Lolo Bremo Quartet, Beialafóniku Asembleia. Iha grupu estranjeiru rua, hanesan Alistair Brown Group, husi Fransa, no Ho Hum, husi Estadus Unidus, atu harii konsertu múzika jazz nian iha kalan ne’ebé sei hahú iha tuku 7 lokraik no loke ba públiku, atu promove toleránsia, respeitu no komprensaun entre kultura sira.
Aleinde aprezentasaun múzika sira-ne’e, komisaun organizador, iha parseria ho voluntáriu foin-sa’e sira husi Uma Amerika, Sentru Kulturál Amerikanu husi Universidade Nasionál Timor-Leste no Asosiasaun Arte Empreza ne’ebé organiza atividade kona-ba espozisaun arte múzika, edukasaun sívika kona-ba prezervasaun biodiversidade marítima no mós promosaun programa bolsa-estudu ne’ebé oferese husi Governu Amerika Norte.
Jornalista : Felicidade Ximenes
Editór : Zezito Silva
