Reabilitasaun estrada Baguia afeta uma ida hetan estragus
BAUCAU, 30 abríl 2024 (TATOLI) – Reabilitasaun estrada diresaun Laga to’o Baguia afeilta uma ida hetan estragus iha área Haudare, Aldeia Afa, Suku Alaua Leten, Postu Administrativu Baguia.
Inan faluk, Fernanda Simoês nu’udar uma-nain esplika, uma referida hetan bainhira kompañia kee luan estrada nune’e bainhira udan hamosu rai-halai nune’e afeta ba uma monu no estragus.
“Hau-nia uma estragus total hotu, tanba kompañia ke’e rai mak monu,” Fernanda Simoês hateten liuhosi telefónika, tersa ne’e.
Uma ho medida metru 8×6, taka ho kalen kompostu husi kuartu tolu, sala rua inklui varanda ida ne’ebé antes estragus, uma-nain konsege salva sasan sira ne’ebé ajuda hosi viziñu.
Ho situasaun ne’e, Fernanda Simoês hamutuk ho oan nain-neen, kompostu husi feto nain-haat no mane na’in-rua, provizóriu hela ho família ne’ebé hela besik iha área referida.
“Ha’u sente triste tanba lakon uma, ha’u mos feto-faluk tan ho hau nia oan sira,” Simoês akresenta.
Simoês husu Governu atu fo hanoin ba kompañia atu responsabiliza situasaun ne’ebé hasoru nune’e bele iha solusaun tanba autoridade suku no postu halo ona identifikasaun ba uma refere, tuir planu atu entrega dadus ba kompañia responsabiliza projetu reabilitasaun estrada diresaun Laga no Baguia.
Projetu reabilitasaun estrada Laga-Baguia responsabiliza hosi kompañia Norinco International Cooporation purvolta kilómetru 38 ho luan metru neen ho nia totál orsamentu hamutuk millaun $21.7.
Jornalista : Natalino Belo
Editór : Evaristo Soares Martins
