DILI, 30 abríl 2024 (TATOLI) – União das Cidades Capitais de Língua Portuguesa (UCCLA) hamutuk ho Uniaun Europeia (UE) atribui sertifikadu kursu língua portuguesa no informátika ba formandu hamutuk 110 hosi Autoridade Munisípiu Dili.
“Ohin ita entrega sertifikadu ba formandu sira ne’ebé mak remata sira-nia kursu durante fulan tolu no formasaun ne’e haree liubá língua portuguesa no mós informátika. Totál fromandu hamutuk 110”, Embaixadora Portugal iha Timor-Leste, Manuela Bairos informa ba TATOLI bainhira remata atribui sertifikadu ba formandu sira iha Embaixada Portugal, ohin.
Nia dehan, formasaun ida-ne’e importante tebes ba funsionáriu Autoridade Munisipál Dili atu sira bele implementa fila fali iha sira-nia servisu fatin.
“Línagua portuguesa iha lian oioin hanesan A2 no B1. Ida-ne’e aprende kona-ba portugés bázika sira, oinsá atu komunika malu iha servisu fatin, agora informátika ida-ne’e oinsá bele hatene kona-ba laptop no komputadór sira ne’ebé mak iha, entaun saida mak sira aprende bele ba implementa iha sira-nia servisu fatin”, nia afirma.
Projetu ida-ne’e realiza tanba hetan fundu hosi Uniaun Europeia no prosede formasaun ida-ne’e hosi ekipa Camara Munisipal Lisboa ne’ebé foku liubá lian portugés no informátika.
Iha fatin hanesan, Xefe Ekipa Delegasaun Uniaun Europia iha Timro-Leste, Suzana Martins hateten projetu ida-ne’e apoiu hosi Uniun Europeia ba programa formasaun dalen portugés no informátika.
“Iha serimónia atribuisaun sertifikadu ba formandu sira ne’ebé mak konklui ona sira-nia kusru língua portugés no informátika, entaun iha formasaun ida-ne’e atu hasa’e sira-nia abilidade ba língua no informátika atu sira bele implementa iha sira-nia servisu fatin”, Suzana dehan.
Prezidente Autoridade Munisípiu Dili, Grigorio Saldanha, agradese ba Embaixada Portugal ne’ebé fasilita ona formasaun dalen portugés no informátika ba funsionáru Autoridade Munisípiu Dili.
‘’Ha’u agradese ba UCCLA no Uniaun Europeia ne’ebé fó oportunidade ba joven sira atu aprende tan língua portugés tanba ita adopta ona lian ida-ne’e hanesan dalen ofisiál, entaun ita tenke aprende nafatin nune’e bele koalia iha fatin ne’ebé deit,” Grigorio Saldanha informa.
Formanda, Justina Amaral hosi Autoridade Munisípiu Dili agradese ba UCCLA no Uniaun Europeia ne’ebé mak fó ona formasaun kona-ba língua portuguesa no informátika nian.
“Ami kontente tebes formasaun ida-ne’e tanba haree liubá lian portugés iha nivel A2, B1 no mós informátika nian”, Justina subliña.
Nia revela, funsionáriu sira seidauk tuir formasaun durante ne’e, entaun susar atu ko’alia dalen portugés, maibé oportunidade ida-ne’e bele ajuda hodi aumenta koñesimentu.
Jornalista : Felicidade Ximenes
Editór : Zezito Silva
