DILI, 02 maiu 2024 (TATOLI)— primeiru-Ministru (PM), Kay Rala Xanana Gusmão, simu delegasaun investidór ne’ebé xefia husi Chief Executive Officer, Global Yellow Pages Singapura, Stanley Tan, hodi espresa komitementuno partilla hanoin hodi fó apoia ba dezenvolvimentu Timor-Leste (TL) iha área edukasaun no dezenvolvimentu komunitáriu.
“Ami mai iha ne’e, hasoru-malu ho Primeiru-Ministru, Kay Rala Xanana Gusmão hodi fahe esperiénsia kona-bá ami-nia atividade sira, no ami hakarak atu apoia Timor-Leste, iha área edukasaun no dezenvolvimentu komunitária. Ida-ne’e mak ami ko’alia ho Primeiru Ministru,” hateten Stanley Tan, iha Palásiu Governu, kinta ne’e.
Durante hasoru-malu ho Xefe Governu apresia no agradese ba inisiativa hosi emprezáriu Singapura ne’e, no ba oin sei haree hamutuk implementasaun programa hirak ne’e.
Stanley Tan, nu’udár CEO Global Yellow Pages Singapore, Diretór no fundadór bá empreza investimentu Global Media Holdings, ne’ebé iha mós investimentu estratéjika ida iha Global Yellow Pages Limited. Stanley Tan hanesan mós diretór bá Angliss Property Group, ne’ebé investe bá imobiliáriu iha Austrália.
Tinan barak liu, Stanley Tan ninia vida negósiu investe mós iha mídia no publikasaun, dezenvolvimentu no investimentu imobiliáriu, otéis no jestaun oteleira.
Stanley Tan, mós hanesan CEO Asia Philanthropy Circle Ltd.(APC) ne’ebé servisu iha área dezenvolvimentu umanu no tempu barak apoia komunidade iha Tiongkok, Timor-Leste, Kamboja, Thailándia no Filipina.
Rekorda fali katak antes ne’e, delegasaun hosi empreza Asia Cargo Network hosi Singapura, tersa ne’e, hasoru malu ho eis PM, Taur Matan Ruak, hodi halo aprezentasaun ida ligadu ho planu investimentu iha setór aéreu iha Timor-Leste.
Durante hasoru malu ho eis PM Taur Matan Ruak hodi aprezenta planu investimentu ho objetivu atu harii empreza airline ida ho bandeira Timor-Leste. Voo ne’e doméstiku no kontinua rute Dili-Darwin no Dili-Bali, Dili-Singapura no Dili-Kupang, sei loke mós ba rute ba nasaun sira ne’ebe mak iha ona Air Service Agreement (ASA).
Objetivu importante maka hakarak Timor-Leste tenke iha rasik aviaun ida, ne’ebé ho tipu Boing 737 800NZ sei mai hosi Amérika.
Investidor hosi Singapura ne’e antes ne’e investe ona iha nasaun tolu no kobre Ázia pasifiku tomak iha área aéreu.
Planu investimentu ne’e ho previzaun sei emprega traballador timor-oan 99% no parte administrasaun sei responsabiliza hosi entidade investidór.
Jornalista: Hortencio Sanchez
Editór : Florencio Miranda Ximenes
