MANATUTO, 05 maiu 2024 (TATOLI)— Provínsia Hunan husi Xína liu hosi Vise Governadór, Zhang Jian Fei entrega mákina agríkola ba Munisípiu Manatuto hodi selebra tinan sanulu (10) kooperasaun servisu entre Provínsia Hunan no Munisípiu Manatuto.
Zhang Jian Fei hateten apoiu hirak ne’ebé Governu Provínsia Hunan oferese hola parte mos ba programa koperasaun internasionál iha setór agríkola entre Provínsia Hunan, Xína, no Munisípiu Manatuto ne’ebé lansa ona.
“Governu Xína iha ona relasaun diak ho nasaun ne’e (Timor-Leste) hahu kedas iha nia loron restaurasaun independensia. Tinan sanulu liu ba Hunan no Manatuto mós desenvolve relasaun amizade hamutuk, no tinan lima ho akordu Sister City. Ita servisu hamutuk ona iha projetu barak. Ohin loron ami sei oferese ekipamentu ka makína agríkola no ida ne’e mak Hunan nia esperansa ba komunidade iha Manatuto,” Zhang Jian Fei dehan liu husi nia diskursu iha Manatuto Villa, domingu ne’e.
Mákina hirak ne’ebé oferese mak hanesan Tratores lagartos (1), Tratores de rodas pneumáticas (1), Cultivador rodante (2), Disco de Arado (2), Trator (2), Cultivador Micro (5), Transplantador de Arroz (2), Mini ceifador de arroz (2), Mini cultivador de arroz (10) no Pulverizador (25).
Nia espera, relasaun entre Provínsia Hunan no Munisípuiu Manatuto inklui nasaun Xína no Timor-Leste bele lao diak liu tan ba oin.
Diretúr Jeral ba Desentralizasaun no Governu Lokal, Antonio Augusto Guterres hateten hodi selebra tinan sanulu kooperasaun ne’e Provínsia Hunan mós fo apoiu buat seluk hanesan haruka perítu nain tolu iha área agríkola iha abríl liu ba hodi hanorin agrikultór sira iha Manatuto oinsa kuda hare hybrida, kuda modo no hakiak animal.
“Apoiu sira mak fo fini hare hybrida, modo musan, hakiak animal liu-liu fahi, apoiu mós material edukasaun nian hanesan pasta 1.000 ba estudante iha Eskola Kay Rala,” Nia esplika.
Iha fatin hanesan Primeiru Ministru, Kay Rala Xanana Gusmão hato’o agradese ba Provínsia Hunan ba apoiu sira no rekomenda ba komunidade Manatuto tomak atu esforsu aan nafatin desenvolve setór agrikultura hodi hadia ekonomia.
“Labele ba deit hanoin ba laptop maibé ba agrikultura, kurizi mentalidade barukten hodi eduka ba agrikultura, hortikultura, selae buat hotu ita sosa. Edukasaun tenke loke dalan ona no PAM (Prezidenti Autoritade Munisipiu) ho Postu Administrativu tenke hare’e ba posibilidade sira. Governu sei loke kréditu ba agrikultór sira hodi desenvolve ekonomia, no povu tenke servisu, buka aprende ho tékniku sira husi Hunan,” PM Xanana deklara.
Iha selebrasaun ba tinan sanolu kooperasaun ne’e, Vise Governadór Provínsia Hunan husi Xína, Zhang Jian Fei hamutuk ho Primeiru Ministru, Kay Rala Xanana Gusmão mós asina termu referensia ida hodi kontinua kooperasaun servisu sira iha area oin-oin hanesan agrikultura, turizmu, interkambiu kultural, edukasaun no seluk tan.
Kooperasaun servisu entre Provínsia Hunan no Munisípiu Manatuto hahu ona iha tinan 2014 liu husi asina Carta de Internações, hafoin iha tinan 2019, kontinua renova kooperasaun ho asinatura akordu Sister City.
Rezultadu seluk husi kooperasaun ne’e mak iha tinan 2019, fulan Setembru, iha area interkambiu kultural, Provinsia Hunan haruka nia delegasaun artistas nebe’e halo ezibisaun atuasaun iha Manatuto no Dili.
Nune’e mós iha abril 2024, Governu Provínsia Hunan lansa ka fo anunsiu ba Manantuto oan sira inklui Timoroan seluk konaba Admission Brochure for “Furong Scholarhip Programme” hodi ba estuda iha Hunan Normal University, hahu tinan akademiku 2024/2025.
Jornalista : Cidalia Fátima
Editora : Armandina Moniz
