SERVE submete ona lista antigu funsionáriu ba MKAE atu aprova
DILI, 07 maiu 2024 (TATOLI) – Diretór Ezekutivu Servisu Rejistu no Verifikasaun Emprezariál, Institutu Públiku (SERVE, I.P), Florencio Sanhes, hateten SERVE.IP, iha fulan-Marsu, haruka fila fali lista ba antigu funsionáriu hamutuk 166 ba Vise Primeiru-Ministru no Ministru Koordenadór ba asuntu Ekonómiku no Ministru Turizmu no Ambiente, Francisco Calbuady Lay, atu aprova atu funsionamentu SERVE bele la’o normál fila fali iha Timor-Leste.
“Iha loron 20 fevereiru, Vise Primeiru-Ministru no Ministru Koordenadór asuntu Ekonómiku no Ministru Turizmu no Ambiente hato’o karta mai dehan rekruta ema na’in-10, maibé ha’u la bele fó ema na’in-10 de’it tanba servisu SERVE nian boot tebes, entaun ha’u haruka fila fali karta ida ba Vise Primeiru Ministru hodi hato’o lista antigun funsionáriu ne’ebé mak antes ne’e nia kontratu remata iha 31 dezembru, entaun ida-ne’e ita hein MKAE atu aprova nune’e funsionamentu SERVE IP bele la’o normál fila fali iha Timor-Leste”, Florencio Sanhes, hateten ba TATOLI iha nia kna’ar fatin, ohin.
Nia afirma, lista ne’e hato’o ba Vise Primeiru Ministru no Ministru Koordenador Asuntu Ekonómiku no Ministru Turizmu no Ambiente iha fulan-Marsu nia laran tanba ne’e, hein aprovasaun, tanba durante ne’e funsionamentu normál iha munisípiu la lao.
“Hosi janeiru to’o agora, ita-nia servisu iha munisípiu sira la la’o, tanba ita-nia ema laiha, tanba ne’e ita hein de’it desizaun Vise Primeiru Ministru nian, nune’e atividade sira bele la’o ho di’ak fila fali hanesan uluk”, nia konklui.
Jornalista : Felicidade Ximenes
Editór : Zezito Silva
