EKONOMIA, HEADLINE

Empreza hamutuk 1.300 rejistadu iha SERVE, I.P

Empreza hamutuk 1.300 rejistadu iha SERVE, I.P

Diretór Ezekutivu SERVE, I.P, Florêncio da Costa Sanches. Imajen Tatoli/Francisco Sony

DILI, 07 maiu 2024 (TATOLI)— Husi janeiru to’o marsu, Servisu Rejistu no Verifikasaun Emprezariál, Institutu Públiku (SERVE, I.P) rejista empreza hamutuk 1.300, halo atividade ekonómiku iha Timor-Leste, Diretór-ezekutivu, Florêncio Sanhes relata.

“SERVE, I.P rejista pedidu ne’ebé mak tama hamutuk 2.000-resin, inklui rejistu foun no mós alterasaun sira, maibé ita halo verifikasaun ida-ne’ebé mak konsege rejista ne’e hamututk 1.300-resin. Husi ne’e iha na’in rua mak empreza estranjeiru ne’ebé hala’o sira-nia atividade ekonómika iha ita-nia rain,” Florêncio Sanhes, informa ba TATOLI iha nia kna’ar fatin, ohin.

Ezekutivu ne’e dehan, iha tinan kotuk empreza ne’ebé taka nia atividade hamutuk 66 tanba empreza sira ne’e problema ho sira-nia atividade ne’ebé mak sira iha.

“Se ita taka empreza labele moris ona hanesan mós ita ema mate dala ida, tanba ne’e iha tinan kotuk empreza sira ne’ebé mak problema atividade no sira taka hamutuk 66,” nia haktuir.

Diretór-ezekutivu Florêncio Sanches informa, bainhira empreza ida hakarak taka tomak nia empreza SERVE haruka ba Ministériu Finansa hodi haree sistema katak empreza ida-ne’e la iha dívida ruma husi Estadu, SERVE prosesu bele taka. Maibé, iha dívida ruma bele taka atividade maibé labele taka empreza ne’e.

Empreza sira ne’ebé mak rejista iha SERVE,ne’e maioria  sira-nia atividade hanesan Indústria, Agrikultura no Turizmu.

“Emprezáriu barak mak halo atividade indústria, agrikultura no turizmu tanba Governu mós tau hela fundu iha Banku Komersiál (BNCTL, red) katak se mak foti setór turizmu no se mak foti setór agrikultura ka industria, se bele asesu ba 500 milhoes ne’ebé mak Governu tau hela iha ne’ebá, bainhira emprezáriu sira kumpri kritéria sira ne’ebé iha, mak bele foti osan ne’e hodi finansia sira-nia kapitál hodi bele halo indústria sira seluk ne’ebé mak sira hakarak,” nia konklui.

Jornalista : Felicidade Ximenes

Editór: Rafael Ximenes de A. Belo

 

iklan
iklan

Leave a Reply

iklan
error: Content is protected !!