iklan

EKONOMIA, BAUCAU, HEADLINE, MUNISÍPIU

BTL Baucau menus rekursu umanu

BTL Baucau menus rekursu umanu

Responsável BTL munisípiu Baucau, Adriana Belo da Rosa. Imajen Tatoli/Natalino Belo.

BAUCAU, 08 maiu 2024 (TATOLI) – Bee Timor-Leste, empreza públika (BTL.ep) munisípiu Baucau, menus rekursu umanu liuliu iha área tékniku manutensaun hodi halo atendimentu ba kliente.

Responsável BTL,E.P Munisípiu Bauca, Adriana Belo da Rosa, esplika, kliente barak mak sei kestiona kona-ba fornesementu bee-moos maibé situasaun interna iha BTL.ep Baucau sei menus rekursu umanu hodi kontrola fallansu sira iha terrenu.

“Ita hatene katak, bainhira atu nafatin eziste kontinuasaun bee ne’e iha komunidade nia leet ita presiza mós pesoál manutensaun no operasaun,” Adriana Belo hateten iha Vila Nova, kuarta ne’e.

BTL.ep Baucau rejista totál kliente ne’ebé asesu bee-moos hanesan iha urbana komposta hosi área Vila Nova to’o Vila Antiga hamutuk uma-kain 1.983, ne’ebé área kobertura luan nune’e forsa ekipa lato’o atu kontrola iha terrenu.

“Difikulta tebes maibé motivasaun serbisu ba ekipa sira mak di’ak, nune’e sira kolen mós kontinua halo servisu kontrola kuandu iha ejizénsia ruma husi komunidade entaun ema ne’ebé atu haree ida-ne’e limitadu tebes,” Belo akresenta.

BTL.ep Baucau rasik hato’o ona situasaun referida ba nasionál hanesan halo rekrutamentu ba pesoál tékniku manutensaun no kontrola nunee bele hatan ba preokupasaun husi kliente hanesan oferese bee ba komunidade tuir oráriu ne’ebé estabelese ona.

“Agora ita halo fornesimentu barak hanesan nee, ita presiza tán ekipa manutensaun no operasaun presiza tan na’in-neen,” Adriana Belo argumenta.

Totál funsionáriu ne’ebé daudaun servisu iha BTL.ep Baucau hamutuk na’in-14, komposta husi koordenadór, finansa administrasaun, tékniku operadór, apoiu kliente inklui motorista.

Jornalista   : Natalino Belo 

Editór         : Evaristo Soares Martins

iklan
iklan

Leave a Reply

iklan
error: Content is protected !!