Dezastre naturál estraga uma 23 iha Baucau
BAUCAU, 09 maiu 2024 (TATOLI) – Autoridade Protesaun Sivíl Munisípiu Baucau rejista uma hamutuk 23 hetan estragus ne’ebé afeta husi udan no anin.
Komadante Autoridade Protesaun Sivíl Munisípiu Baucau, Inspetór Aleixo Ximenes, esplika, uma hirak-ne’e estragus tanba udan-boot halo rai halai hanesan iha postu Quelicai hamutuk uma 15, Venilale uma ida no Baguia hitu.
“Diak liu prepara ita-nia aan halo uma iha fatin seguru, kuidadu aan labele besik liu fatin risku sira,” Komandante Autoridade Protesaun Sivíl Munisípiu Baucau hateten iha Vila Antiga, kinta ne’e.
Husi postu tolu refereda postu Quelicai mak rejista uma 15 kompostu uma haat estragus no 11 iha ameasa atu estragus hanesan iha suku Abo uma lima, Maluru hitu no Laisorulai de Baixo uma rua.
Postu Venilale iha uma ida estragus iha suku Uatuhako no uma hitu iha suku Samalari, postu Administrativu Baguia.
Husi uma hirak-ne’e, uma ualu mak hetan ona apoia emerjénsia tanba rejistu uluk, enkuantu restante sei hein apoia bainhira ekipa to’o iha terrenu hodi halo identifikasaun no rejistu nunee sei fó apoiu emerjénsia iha tempu besik.
“Material rekuperasaun sei fó apoiu besi, kalen simentu, pregu nune’e sira halo fali uma,” Inspetór Aleixo Ximenes akresenta.
APC simu informasaun husi vitíma sira hafoin akontese dezastre naturál hodi estraga uma nune’e parte responsável tuir planu sei ba terrenu hanesan iha Postu Baguia no Venilale antes kategoria ba estragus no ajuda emerjénsia no materiál rekuperasaun.
“Venilale, Baguia no Kelikai balun neebe seidauk, ami planu ona udan nee menus ami ba ona,” nia akresenta.
APC Baucau husu komunidade atu nafatin atensaun atu sees aan bainhira akontese udan no anin tanba bele fó impaktu ba vida.
Alende ne’e, husu komunidade ne’ebé apoia ona materiál rekuperasaun tenke konstrui uma iha fatin seguru, mak hanesan, labele foho lolon, mota ibun no tasi ibun, tanba fasil atu hetan dezastre naturál.
Jornalista : Natalino Belo
Editór : Evaristo Soares Martins
