DILI, 09 maiu 2024 (TATOLI)—Prezidente Instituto Camões, Ana Paula Fernandes hateten, Instituto Camões prepara akordu tolu atu asina ho Governu Timor-Leste kona-ba otelaria, kapasitasaun rekursu umanu no ekonomia azul iha tempu-badak.
“Ohin ami enkontru ho Vise-primeiru Ministru no Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay ho asuntu importante sira mak oinsá halo kooperasaun entre Timor-Leste no Portugal ne’ebé ko’alia kona-ba ekonomia azul, otelaria no kapasitasaun rekursu umanu,” Ana Paula Fernandes informa ba jornalista sira bainhira ramata enkontru ho Vise-primeiru Ministru, iha Farol, Dili, ohin.
Prezidente ne’e dehan, iha akordu ne’e atu responde ba prioridade sira ne’ebé mak TL iha ba área importante sira atu dezenvolve ekonomia iha nasaun hodi kria servisu ba joven timoroan sira.
Iha fatin hanesan, Vise-primeiru Ministru, Ministru Konrdenadór Asuntu Ekonómiku no Ministru Turizmu Ambiente, Francisco Kalbuadi Lay, informa katak enkontru ho ekipa Instituto Camões ne’e atu haree liu ba akordu sira ne’ebé mak sei asina iha tempu-badak nia laran.
“Ami sei asina akordu lubuk ida iha fulan rua mai, kona-ba área otelaria, kapasitasaun rekursu umanus no Ekonomia Azul,’” governante ne’e konklui.
Jornalista: Felicidade Ximenes
Editór: Rafael Ximenes de A. Belo
