DILI, 13 Maiu 2024 (TATOLI) – Diresaun Nasionál Ortikultura, Ministériu Agrikultura, Pekuária, Peska no Floresta (MAPPF), fó ona fini ai-fuan hamutuk rihun 190 ba grupu agrikultór sira iha munisípiu atu kuda iha sira-nia to’os.
Diretór Nasionál Ortikultura, Lúcio Ramiro Ribeiro, hateten fini ai-fuan ne’ebé apoia ona ba agrikultór maka hanesan rambutaun, durian, dragaun, no has graftin, tanba fini sira ne’e sei fó lukru di’ak ba grupu agrikultór sira iha futuru bainhira produtu sira ne’e fa’an iha merkadu.
Fini ai-fuan rihun 190 ne’ebé fahe ona mak dragaun rihun 30, has graft in rihun 30, durian rihun 30 no rambutaun rihun 100.
“Fini ai-fuan sira ne’e kuaze ninia merkadu di’ak tebes. Bainhira agrikultór sira badinas, kuidadu halo manutensaun, tinan rua hanesan ne’e bele kolleta ona. Tanba ne’e maka ita apoia fini ai-fuan sira ne’e ba sira atu kuda hodi ajuda hasa’e rendimentu família nian”, Lúcio Ribeiro dehan iha Comoro, ohin.
Diretór ne’e esplika katak rambutaun ne’e ninia prosesu atu kolleta ne’e presiza tinan rua ba leten, maibé fuan haat de’it $1, signifika fuan ida sentavu 0,25. Ai-fuan dragaun fuan haat de’it $5, enkuantu durian fuan boot $25 no ki’ik entre $10 no $12 no has graftin fuan rua de’it $1.
MAPPF, iha tinan ida ne’e, kontinua tau osan hodi sosa fini ai-fuan sira ne’e hodi disponibiliza ba agrikultór sira. “Osan sira ne’e ministériu uza ona hodi sosa fini ne’ebé prevee ba manutensaun hamutuk rihun $27 kompara ho tinan kotuk tau osan hamutuk rihun $61 hodi sosa fini. Tinan ida ne’e ita kontinua distribui ba agrikultór sira iha munisípiu hotu, úniku Ataúro no Oé-Cusse maka ita seidauk distribui”, nia relata.
Aleinde ne’e, iha semana kotuk, MAPPF lansa ona atividade kuda rambutaun hun 20, dragaun 10, durian 15 no has graftin lima, iha Baguia no Natarbora.
Jornalista: Tomé Amado
Editora: Maria Auxiliadora
