DILI, 13 maiu 2024 (TATOLI)—Ministériu Edukasaun (ME) hili Rejiaun Administrativa Espesiál Oé-cusse Ambeno (RAEOA) hodi realiza atividade jogu amizade, espesífiku programa desportu eskolár entre eskola ensinu báziku, iha juñu tinan ne’e.
“Desportu eskolár ne’e hanesan programa Diresaun Edukasaun Inkluzivu, nune’e kada tinan ita realiza atividade jogu amizade iha munisípiu no tinan ne’e ita eskolla REAOA tanba nia dook husi kapitál nasaun. Ita realiza iha nível ensinu báziku, husi ne’e mak ita bele identifika labarik sira ne’ebé iha talentu ba desportu no entre eskola sira halo amizade ba-malu di’ak liután nomós profesór sira,” Diretór Edukasaun Eskluziva no Asaun Sosiál Eskolár, Fernando Soares, informa ba Agência Tatoli, iha ninia knaar fatin, Vila Verde, segunda ne’e.
Notísia relevante : Eternal Friends Selebra Ezistênsia SENOFA ba dala-XXV ho jogu amizade
Programa ne’e maka atu hatene modalidade talentu kada estudante iha jogu desportivu hanesan voleiból, basketból, no seluk tan, nune’e ME oferese fasilidade hanesan bola, net, no seluk tan.
“Ida-ne’e atribui ona ba eskola sira iha Dili inklui Ataúro, maibé ba ensinu báziku sira de’it. Programa ne’e nia objetivu no vantajen mak atu fó isin di’ak ba estudante no hasa’e koñesimentu kona-ba desportu, nune’e bele tuir prosesu aprendizajen ho di’ak no efetivu. Atividade jogu ne’e mós kontribui ba saúde di’ak no minimiza problema ne’ebé akontese iha eskola sira, tanba haree ba realidade ne’ebé iha Timor-Leste, katak labarik balun gosta envolve iha grupu no halo problema, tanba ne’e ho programa Ministériu Edukasaun iha Diresaun Inkluzivu nian mós enkaixa programa desportu eskolár ne’e,” nia tenik.
Antes ne’e Ministériu Edukasaun (ME) aloka $114.943.286 iha Orsamentu Jerál Estadu (OJE) 2024, ne’ebé iha mós orsamentu ba programa referidu.
Daudaun ne’e ME rejista eskola ensinu báziku filial 71 no ensinu báziku sentrál 20.
Iha parte seluk, Diretor Servisu Edukasaun munisípiu Manatuto, Patrício da Cruz Quintão, hateten, atividade desportu ne’e hala’o depende ba matéria desportu, ne’ebé estudante sira simu husi profesór, tanba daudaun ne’e atividade desportu eskolár la’o di’ak hela.
“Atividade desportu eskolár iha eskola sira munisípiu Manatuto la’o ho di’ak, ami-nia atividade desportu eskolár ne’e la’o, iha estudante husi ensinu báziku maibé inklui estudante sira husi nível ensinu sekundáriu, tanba atividade ne’e hahú kedas husi nível ensinu bázikui,” nia dehan.
Jornalista : Osória Marques
Editora : Julia Chatarina
