DILI, 13 maiu 2024 (TATOLI)–Ministériu Edukasaun (ME) iha fulan-maiu ne’e sei reativa saláriu ba profesór hamutuk 400-resin, ne’ebé ho estatutu kontratu inderteminadu.
“Fulan-maiu ne’e ita paga profesór 400-resin inderterminadu, maiu ne’e ita reativa fali ona sira-nia saláriu hanesan baibain, no retro sira-nia saláriu husi fulan-janeiru to’o abríl,” Diretór Nasionál Rekursu Umanu husi Ministériu Edukasaun (ME), Anita Tavares de Jesus, informa ba Agência Tatoli, iha ninia knaar fatin, Vila Verde, segunda ne’e.
Nia dehan, pagamentu ne’e loloos realiza ona maibé antes ne’e ME presiza verifika dadus ho kuidadu.
“Ita demora tanba ita hein husi munisípiu hotu-hotu depois ita haruka ba Komisaun Funsaun Públika no agora ita iha ona despaisu no prosesa ona ba Ministériu Finansa atu halo pagamentu, ita espara katak iha fulan-maiu nia-laran bele simu sira-nia saláriu,” nia akresenta.
Notísia relevante : ME hahú normaliza saláriu profesór no propoin orsamentu ba tinan ne´e
ME klasifika manorin-na’in hirak ne’e laiha abiliasaun akadémika mínimu baxarelatu.
“Sira-ne’e ita bele dehan asistente, nune’e ita selu fali sira husi janeiru mak mai, se osan iha ita selu hahú husi janeiru maibé laiha ita selu ba oin de’it. Nune’e labele lakon saláriu, tanba sira mós iha nesidade,” Diretora tenik.
ME antes ne’e fó opsaun rua ba manorin-na’in hirak ne’e, hanesan indenizasaun bainhira sira lakohi ona kontratu, maibé bainhira sira hakarak kontinua kontratu mak ho estatutu indeterminadu ho grau D.
“Entaun sira-ne’e hotu eskolla opsaun hakarak kontratu, nune’e iha maiu ne’e sira sei hetan sira-nia direitu. Profesór ho estatutu indertiminadu ne’e pakote hanesan ho ingresu espesiál, maibé sira la prense kritériu tanba sira laiha abiliasaun akadémika, ba lisensiatura ka mínimu baixarelatu, sira-ne’e kategoria grau D,” Anita Tavares, esplika.
Tuir Diretora ne’e, manorin-nain ho estatutu indeterminadu iha munisípiu hotu iha, maibé nia númeru la barak hanesan iha munisípiu Liquiçá iha na’in-14 no Dili iha 80-resin, enkuantu iha munisípiu seluk iha maibé ladún barak.
Orsamentu Jerál Estadu (OJE) 2024 ne’ebé aloka ba ME ho montante $114.943.286, kompostu husi saláriu no vensimentu $87.431.460, bens no servisu $439.854, transferénsia públika $9.257.278, kapitál menór $1.818.693, kapitál dezenvolvimentu millaun $5.
Jornalista : Osória Marques
Editora : Julia Chatarina
