DILI, 13 maiu 2024- Operadór telekomunikasaun Timor Telecom liuhosi Chief Executive officer (CEO), Rita Sampaio Nunes hamutuk ho Diretór Enjeñariu no Operasaun, Francisco Leite, halo audiénsia hodi konsulta ho Primeiru-Ministru (PM), Kay Rala Xanana Gusmão, oinsá hadi’a kualidade atendimentu no fornesimentu internet di’ak liu bá kliente sira iha Timor Leste.
Dirijente Timor-Telecom ne’e mós ko’alia ho Xefe Governu kona-bá investimentu no planu iha futuru ne’ebé Timor-Telecom bele kontribui ba dezenvolvimentu iha área komunikasaun iha Timor-Leste.
“Ko’alia ho Primeiru-Ministru kona-bá dezenvolvimentu setór komunikasaun iha Timor Leste, oinsá Timor-Telecom ho esforsu tomak atu hadi’a di’ak liután servisu atendimentu no fornesimentu internet ba kliente sira. Ita mós iha mudansa ba estrutura, entaun aproveita iha biban ne’e fó koñese jestór Timor-Telecom foun bá Primeiru-Ministru,” Rita hateten hafoin reuniaun ho PM Xanana iha palásiu Governu, segunda ne’e.
Nune’e mós Diretór enjeñaria no operasaun Timor-Telecom, Francisco Leite, aprofunda katak, pontu importante ne’ebé informa bá Primeiru-Ministru maka kona-bá dezenvolvimentu rede, kapasitasaun rekursu umanu hodi responde dezafiu merkadu, bele adapta ba teknolojia foun ne’ebé mosu mai.
Francisco Leite mós rekoñese katak, durante ne’e mosu preokupasaun barak hosi kliente sira ligadu ho rede internet ne’ebé fraka tebes no falla, ida-ne’e sira rejista atu kontinua esforsu hodi buka solusaun.
Tuir nia, buat ne’ebé kontribui bá internet lentu maka Timor-Leste iha dependénsia totalmente fornesementu internet mai hosi rai-li’ur.
Tanba ne’e, nia hatutan, assesu internet la’ós haree de’it mak antena maibé haree mós kapasidade rekursu ne’ebé kada antena bele disponível bá kliente sira.
Timor Telecom halo esforsu iha tinan rua ikus, hodi hadi’a parte asesu ho konstrusaun sítiu foun no aumenta kapasidade, ezemplu hanesan introdusaun 4G+, atualmente iha hela preparasaun bá lansamentu pilotu rede internet bá 5G atu hasa’e kapasidade rekursu rede, nune’e kliente barak liu assesu rede internet ho kualidade.
Oras-ne’e daudaun Timor-Telecom iha ligasaun haat, atualmente rua liga direta bá Singapura, ligasaun rua seluk foti hosi empreza lokál Sacom TL no empreza Metrolink no internet foti hosi Indonézia.
Timor-Telecom mós rejista ona kliente hamutuk 400.000, hosi totál ne’e iha kliente 300.000-resin mak ativu uza liña internet.
Jornalista: Hortencio Sanchez
Editór: Florencio Miranda Ximenes
