DILI, 13 maiu 2024 (TATOLI) –Prezidente Repúblika, José Ramos Horta, hasoru malu ho Embaixadór Brunei Darussalam iha Timor-Leste, Wan Hadfi Lutfan, segunda ne’e, iha Palásiu Prezidensiál Dili, hodi ko’alia kona-ba preparasaun Timor-Leste nian hodi simu vizita liurai Brunei Sua Majestade Sultan Hassanal Bolkiah mai Timor-Leste iha 20 Maiu.
“Hasoru malu ne’e foka liuba preparasaun vizita ne’ebé sei hala’o husi Sua Majestade Sultaun Hassanal Bolkiah, ne’ebé sei sai nu’udar konvidadu ba onra Timor-Leste nian iha loron 20 Maiu 2024,” Embaixadór ne’e hatete ba jornalista sira hafoin enkontru ho Xefe Estadu.
Diplomata ne’e dehan, Brunei nu’udar nasaun dahuluk ida-ne’ebé rekoñese Timor-Leste hafoin nia restaurasaun independénsia husi Indonézia iha tinan 2002 liuhusi luta naruk no relasaun diplomátika entre nasaun rua ne’e nafatin besik to’o agora metin liu-tan.
Selebrasaun loron independénsia nian iha loron 20 Maiu sei hala’o parada militár, dezempeñu kulturál no festa sira seluk iha serimónia hasa’e bandeira nia sorin inklui kondekorasaun ba ema hirak ne’ebé kontribui ona ba dezenvolvimentu rai ida-ne’e.
Prezensa lider ida-ne’ebé respeitu hanesan ne’e sai nu’udar testemuña ida ba relasaun forte entre Timor-Leste no Brunei.
“Ida-ne’e sei sai hanesan vizita dahuluk ba Timor-Leste tanba nasaun Sudeste Aziátiku komemora liberdade no demokrasia durante tinan rua nia laran,” nia tenik.
Alende ne’e, Embaixadór ne’e hatete, relasaun billaterál entre Timor-Leste ho Brunei metin tebes no Bruni prontu apoiu nafatin dezenvolvimentu Timor-Leste nian liuliu iha área edukasaun, ekonomia no seluk tan.
Jornalista: Hortencio Sanchez
Editór: Florencio Miranda Ximenes
