DILI, 15 maiu 2024 (TATOLI)– Konsellu Ministru, kuarta ne’e, iha Palásiu Governu Dili, halo aprovasaun ba projetu Rezolusaun Governu ne’ebé aprezenta husi Ministra Finansa, kona-ba reforma sistema kontabilístiku.
“Objetivu husi reforma ida-ne’e atu garante viabilidade no modernizasaun iha inskrisaun, klasifikasaun no rejistu ba reseita no despeza sira, atubele promove transparénsia iha finansa públika no privada sira no mós promove dezenvolvimentu ekonómiku,” refere nota ne’ebé Agência TATOLI asesu husi media Gabinete Primeiru Ministru.
Objetivu prinsipál sira inklui, iha prazu fulan 12, kria padraun kontabilístiku foun ida no planu konta ne’ebé bele aplika ba setór públiku no privadu, hodi aliña ho norma internasionál sira, no implementasaun sistema integradu ida ne’ebé inklui no asegura relasaun entre kontabilidade orsamentál, bazeia ba klasifikadór orsamentál no kontabilidade finanseira, tuir planu kontas.
Sistema ne’e mós tenke simples, fasil no adekuadu atu utiliza ba nesesidade, kapasidade no rekursu ba setór públiku no privadu nasionál.
Iha prazu másimu fulan 24, sei kria mós Konsellu Kontabilístiku Nasionál ida hodi emite norma no rekomendasaun sira. Iha prazu médiu ne’e, sei kria rejime sertifikasaun ida hodi garante kualidade profisionál ne’ebé responsavel ba kontabilidade no asosiasaun profisionál ida ba profisionais kontabilidade no auditoria nian.
Jornalista: Hortencio Sanchez
Editór: Florencio Miranda Ximenes
