iklan

EKONOMIA, HEADLINE

Indonézia apoia tan rihun $249 implementa reforma jestaun finanseira iha TL

Indonézia apoia tan rihun $249 implementa reforma jestaun finanseira iha TL

DILI, 16 maiu 2024 (TATOLI) – Governu Indonézia, liuhosi Ajénsia Kooperasaun Internasionál ba Dezenvolvimentu ka Indonesian Aid, fó asisténsia finanseira millaun Rp4,4, ekivalente ho dolar amerikanu rihun 249, hodi implementa ba Programa Reforma Jestaun Finanseira iha Timor-Leste (TL).

Akordu parseria ne’e asina husi Diretór Ezekutivu Indonesian Aid, Tormarbulang Lumbantobing, ho Diretora-Jerál Tezouru husi Ministériu Finansas, Regina de Sousa. Asinatura ne’e testamuña husi Ministra Finansa, Santina Cardoso no Embaixadór Indonézia, Okto Dorinos Manik.

Ministra Finansas, Santina Cardoso, rekorda asinatura parseria ne’e ba faze daruak nian hafoin faze dahuluk hala’o ona iha tinan 2020-2023.

Santina hateten, kooperasaun ne’e ho objetivu atu estabelese padraun kontabilidade iha setór públiku no privadu sira iha Timor-Leste, atu hametin kapasidade liuhosi fó formasaun ba funsionáriu sira husi Ministériu Finansas no mós sei fó bolsa estudu ba foin-sa’e timoroan sira atu estuda kontabilidade iha Indonézia.

“Apoia finanseira ne’e sei iha impaktu pozitivu, liuliu iha setór kontabilidade, atu bele reforsa tan ita-nia kapasidade funsionáriu sira-nian”, Santina Cardoso informa ba jornalista sira iha Ministériu Finansas, iha Dili.

Kona-ba oportunidade atu fó bolsa estudu, Santina Cardoso dehan katak Ministériu Finansas servisu hamutuk ho Embaixada Indonézia sei halo rekrutamentu ba kandidatu bolseiru sira, tanba dezde tinan kotuk iha timoroan 28 mak atualmente frekuenta hela kursu kontabilidade iha instituisaun ensinu superiór sira iha Indonézia.

Iha fatin hanesan, Embaixadór Indonézia, Okto Dorinus Manik, hatete asinatura akordu ne’e reflete kompromisu Governu indonéziu nian ba dezenvolvimentu Timor-Leste.

Diplomata ne’e hateten katak Embaixada Indonézia iha Dili sei kontinua servisu maka’as hodi promove relasaun di’ak entre nasaun rua iha área oioin tuir ida-idak nia nesesidade.

“Ida-ne’e hanesan kompromisu Indonézia nian atu kontribui ba dezenvolvimentu Timor-Leste nian. Ami fiar katak liuhosi parseria ida-ne’e sei fó impaktu direta ba konstrusaun nasaun ne’e nian”, nia afirma.

Diretór Ezekutivu Indonesian Aid Tormarbulang Lumbantobing, dehan Governu Indonézia implementa ona atividade kooperasaun lubuk ida iha Timor-Leste, ezemplu mak asisténsia dezenvolvimentu ho valór millaun 18.4 rupiah, ekivalente ho dolar millaun ida, iha área saúde, finansas, komérsiu ne’ebé implementa ona durante períodu 2020-2023.

Nia haktuir katak, ba tinan ida-ne’e, Indonesian Aid iha ona planu atu fó tan asisténsia ho valór rupiah millaun 28 ka dolar millaun 1.7 hodi apoia Timor-Leste iha setór edukasaun no finansas.

“Iha tinan ne’e Indonesian Aid sei oferese bolsu estudu, iha ne’ebé Timor-Leste mak konsidera hanesan nasaun ne’ebé ho nia númeru bolseiru barak liu, hamutuk estudante 89 hodi ba halo estudu nível bacharel no mestradu iha Indonézia”, nia konklui.

Jornalista: Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!