BAUCAU, 15 maiu 2024 (TATOLI) – Komunidade hamutuk 13.855 hosi munísipiu Baucau seidauk asesu bee-moos.
Tuir dadus husi Diresaun Servisu Munisipal Água no Saneamentu Baucau, totál uma-kain iha munisípiu Baucau hamutuk 31.836, komposta hosi asesu ona bee-moos hamutuk 18.361 korresponde ho 42% no seidauk asesu bee-moos hamutuk 13.855 korresponde ba 58%.
“BTL nafatin iha konsisténsia atu hakbesik ba komunidade hodi fornese bee-moos ba to’o iha sira-nia leet,” Responsável Bee Timor-Leste, Empreza Publiku (BTL.EP) Baucau, Adriana da Rossa hateten iha Vila Nova, kinta ne’e.
Husi dadus referida iha Postu Baguia uma-kain hamutuk 1.914 mak seidauk asesu bee-moos, no asesu ona hamutuk 1.028, Baucau Vila seidauk asesu 3.331, asesu ona 6.871, Laga seidauk asesu 1.505, asesu ona 3.648.
Postu Quelicai seidauk asesu 5.011, asesu ona 1.578, Vemasse seidauk asesu 905, asesu ona 2.146 no Postu Venilale komunidade seidauk asesu bee-moos hamutuk 1.162 no asesu ona hamutuk uma-kain 3.090.
Maske nune’e, BTL.ep Baucau kompromente no iha konsisténsia atu kontinua oferese bee-moos ba komunidade ho fazeadamente.
BTL.EP halo serbisu iha nível postu administrativu lima hanesan, iha Vemasse halo ona perfurasaun ba bee-moos ho susesu, no daudaun komunidade hamutuk uma-kain 408 mak asesu ona bee-moos.
Postu Administrativu Laga sei halo perfurasaun ne’ebé atinji ona 75%, Quelicai iha Suku Bualale atinje ona 75% no progresu kanalizasaun iha Bee-matan Uaibitai foin atinje 35%.
Baguia utiliza bee matan kulturál ho sistema bomba, sei kanaliza ba multi suku no aldeia, prosesu servisu foin atinji 5% no iha Postu Venilale foin iha faze iha dezeñu detalladu hanesan konstrusaun tanki rezervatóriu no halo instalasaun kanu sira iha tinan ne’e.
“Bainhira ne’e funsiona hotu, la’ós dehan redús liu ona, maibe ita hatan ona komunidade nia halerik ba bee-moos,” Adriana da Rosa akresenta.
BTL sei kontinua halo identifikasaun ba kada uma-kain ne’ebé asesu bee-mos no halo estudu ba bee-matan rurál sira iha nível suku no aldeia, nune’e atu tau iha planu asaun hodi kanaliza ba komunidade iha futuru.
Tuir dadus, Munisipiu Baucau iha bee-matan permanente hamutuk 609, iha postu administrativu kompostu postu Baguia hamutuk 51, Baukau Vila 194, Laga 25, Kelikai 85, Vemasi 15 no Venilale 239.
Alende ne’e, iha mos bee matan periódiku hamutuk 472, kompostu hosi postu Baguia 53, Laga 93, Baguia 212 no postu administrativu Venilale hamutuk 69.
Jornalista : Natalino Belo
Editór : Evaristo Soares Martins
