DILI, 16 maiu 2024 (TATOLI)–Ministériu Edukasaun (ME) mobiliza estudante hamutuk 11.500 hodi simu Liurai Brunei Darussalam, Hassanal Bolkiah Mu’izzaddin Wad’daulah ibni Omar Ali Saifuddien Sa’adul Khairi Waddien ka koñesidu ho naran Hassanal Bolkiah, ne’ebé mai hala’o vizita ofisiál hodi partisipa komemorasaun loron restaurasaun independénsia ba dala-22, iha loron 20 maiu 2024.
“Ohin ita hasoru malu ho diretór eskola sira no ita orienta atu prepara ita-nia estudante sira no oinsá atu mobiliza estudante hamutuk 11.500 hodi forma iha estrada husi Aeroportu Comoro to’o Palásiu Prezidensiál, atu simu ita-nia bainaka espesiál ida husi Brunei,” Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál no Ministru Edukasaun interinu, Domingos Lopes Lemos, iha salaun ME, Vila Verde, kinta ne’e.
Inisiativa ne’e bazeia ba orientasaun husi Vise Primeiru-Ministru, Mariano Asanami Sabino.
“Ita-nia Vise Primeiru-Ministru mak orienta no husu ita-nia partisipasaun, liu-liu estudante sira iha komemorasaun loron restaurasaun Independénsia,” nia akresenta.
Notísia relevante : Xefe Estadu ho Embaixadór Brunei diskute vizita liurai Hassanal Bolkiah
ME hili estudante husi eskola ensinu báziku sentrál ho nia filiál sira iha área Comoro mak partisipa nune’e fásil atu kontrola.
“Ami lakohi estudante ne’ebé barak liu tanba rota ne’ebé iha ne’e dezafiu barak mak sei akontese, bainhira ita mobiliza estudante sira husi parte seluk, ne’ebé ita deside foti estudante sira husi eskola iha área Comoro nian de’it,” nia informa
Iha sorin seluk, Diretora Eskola Básiku Sentrál (EBC, sigla portugés) Farol, Filomena Maria Fatima, hateten, parte eskola prontu atu prepara estudante sira simu Liurai Brunei Darussalam ninia vizita.
“Orientasaun husi leten ita sempre kumpre, ne’ebé ita prontu hodi prepara ita-nia oan sira atu simu Liurai husi Brunei Darussalam nia. Entaun, ami sei foti estudante husi EBC Faról ho filiál husi Fatuhada hamutuk 1.500,” Diretóra Eskola, dehan.
Iha tempu simu bainaka espesiál ne’e, estudante sira sei hamriik iha estrada ho banderola no panfletu hodi hakilar Liurai Brunei Darussalam nia naran.
Jornalista : Osória Marques
Editora : Julia Chatarina
