DILI, 16 maiu 2024 (TATOLI) – Ministériu Obras Públika(MOP) selebra kontratu ho empreza internasionál Interiór Junior Construction ho nia sub-kontratór rua atu reabilita estrada kilometru 10, hahú hosi kruzamentu Laclubar to’o Laclubar Vila, Munisípiu Manantutu.
Ministru Obras Públika Samuel Marçal, hateten MOP selebra kontratu ho Empreza Interiór Junior Construction ho nia sub-kontratór rua mak hanesan Empreza Road no Bridge Group Co Ltd hosi Xina, tanba sai manán aan nain ba konkursu.
“Ohin ita selebra kontratu ho Empreza Interiór Junior Costruction ba reabilitasaun estrada kilometru 10, hahú hosi diresaun kruzamentu área Laclubar nian ba to’o iha Postu Laclubar Villa, reabilitasaun ne’e ho durasaun fulan neen”, Samuel Marçal hateten ba jornalista sira iha salaun MOP Caicoli, kinta ne’e.
Ministru husu ba empreza atu aselera projetu ida-ne’e tuir kontratu ne’ebé determinadu no husu ba komunidaded sira atu koopera, atu servisu bele la’o di’ak.
“Ohin ita husu ona ba sira atu hahú mobiliza sira-nia matéria pezadu hodi ba tau iha fatin reabitasaun estrada Laclubar nian no ita mós husu ba empreza ne’e atu aselera lalais projetu reabilitasaun estrada Laclubar ne’e tuir duni kontratu ne’ebé mak iha”, nia adianta.
Projetu ba reabilitasaun estrada ida-ne’e ho montamte millaun $5.1, hosi Orsamementu Jerál Estadu (OJE) 2024 ne’ebé mak preve iha Fundu Infraestrutura.
“Projetu reabilitasaun ida-ne’e sei la afeta komunidade nian uma ka ai-horis ruma, laiha indemizasaun ba ida-ne’e tanba dalan iha hela maibé kondisaun mak aat, entaun ita halo reabilitasaun de’it tanba ne’e ha’u husu a komunidade Laclubar atu koopera ba projetu ne’e atu labele iha impedementu”, governante ne’e fó-hanoin.
Jornalista tenta atu konfirma nain ba empreza internasionál Interiór Junior Construction ba projetu reabilitasaun Estrada maibé lakohi koalia ho mídia no hatan de’it ho lian inglés next time.
Jornalista: Natalino Costa
Editór : Zezito Silva
