Atividade AIFAESA la la’o tanba lideransa no funsionáriu laiha
DILI, 17 maiu 2024 (TATOLI) – Autoridade Inspesaun no Fiskalizasaun Atividade Ekonómika Sanitaria no Alimentár Institutu Públiku (AIFAESA IP), Ernesto Monteiro, dehan fulan lima ona atividade AIFAESA la lao tanba lideransa no funsionáriu laiha.
“Prosesu kona-ba AIFAESA nia responsabilidade ne’e banhira iha nomeasaun foun, tanba ha’u nia mandatu remata ona iha 31 marsu, entaun ha’u agora hein de’it nomeasaun ema foun atu mai troka servisu ida-ne’e tanba ne’e ha’u horseik urjentemente ko’alia ho Vise Primeiru Minsitru no Ministru Koordenadór Asuntu Ekonómiku no Ministru Turizmu Ambiente katak fulan lima ona, funsionamentu la la’o tanba lideransa no funsionáriu laiha”, Ernesto Monteiro, dehan ba TATOLI iha nia kna’ar fatin Matadoru, ohin.
Nia haktuir, preokupasaun sira ne’e kestiona hosi depuatdu sira inklui sosiedade sivil sira kona-ba atividdade AIFAESA ne’ebé mak durante ne’e la lao ona.
“Atividade la la’o ne’e preokupasaun hosi deputadu no sosiedade sivil sira, maibé realidade lideransa no funsionáriu sira laiha maibé husu ba MKAE atu haree ba kestaun tanba to’o agora seidauk iha solusaun”, nia esplika.
Nia rekoñese, hahan sira barak mak liu prazu iha merkadu sira, tanba atividade AIFAESA la la’o, ida-ne’e sei afeta ba ema nia saúde.
“Los duni katak ai-han sira iha merkadu prazu liu hotu ona maibé ema sei faan tanba laiha ema atu kontrola ida-ne’e, entaun maluk operadór sira mós aproveita buka lukru makas, maibé ha’u la bele halo buat ida, tanba ha’u laiha kompeténsia atu halo intervensaun, tanba ha’u-nia mandatu remata ona iha 31 marsu 2024 ne’e, entaun ha’u agora hein de’it nomeasaun foun atu mai troka servisu ida-ne’e”, nia relata.
Jornalista : Felicidade Ximenes
Editór : Zezito Silva
