NASIONÁL

Festivál Rabilau sei akumula atividade oioin ho fundu millaun $1,5

Festivál Rabilau sei akumula atividade oioin ho fundu millaun $1,5

Secretáriu Estadu Arte no Kultura, Jorge Soares Cristovão. Imajen Tatoli/Egas Cristóvão

DILI, 22 maiu 2024 (TATOLI) – Sekretáriu Estadu Arte no Kultura (SEAK), Jorge Cristóvão konsidera katak orsamentu ne’ebé maka prevee ona atu realiza festivál Rabilau ho montante millaun $1,5 ne’e sei akumula mós atividade lubuk ida ne’ebé sei realiza husi fulan-jullu to’o dezembru tinan ramata.

“Ha’u hakarak klarifika informasaun ba públiku katak osan millaun $1,5 ne’ebé sei gasta ba festivál ne’e sei akumula mós eventu lubuk ida-ne’ebé define ona mak hanesan atividade desportu, atividade kulturál, atividade teknolojia, atividade semináriu, atividade biblioteka movel, atividade edukasaun, atividade natal do povo, no kompetisaun prezépiu,” Sekretáriu Estadu Jorge Cristóvão ba TATOLI iha ninia servisu fatin Praia dos Coqueiros, Dili, ohin.

Tanba ne’e maka preparasaun ba festivál ne’e rasik tuir planu sei realiza iha 27 setembru ho loron Turizmu Internasionál. Festivál ne’e rasik Estadu no Governu realiza mai husi inisiativa Prezidente repúblika, José Ramos Horta nian. Tanba atividade ne’e rasik ninia preparasaun hala’o tiha ona iha fulan rua ba kotuk bainhira Prezidente repúblika konvoka enkontru ida ho Vise-primeiru Ministru na’in rua; Francisco Kalbuadi Lay no Mariano ‘Assanami’ Sabino, hamutuk ho membru do governu sira.

Iha enkontru ne’e rasik konsege harii ona komisaun ida atu aselera servisu sira ne’ebé maka mai husi inisiativa Prezidente repúblika nian. PR rasik introdús ona inisiativa festivál ne’e katak osan ho total millaun $1,5 ne’e prevee ne’e laloos de’it atu halo de’it festivál ne’e, maibé sei realiza mós atividade lubuk ida ne’ebé maka tama ona iha ajenda. Maibé festivál nee konsidera nu’udar inisiativa ida.

Tuir Sekretáriu Estadu ne’e katak atividade festivál ne’e, sei iha mós atividade desportu, atividade siénsia teknolojia, atividade edukasaun, atividade biblioteka movel, kompetisaun ba prezépiu, atividade natal do povo ne’ebé kada tinan Prezidente sempre festeza natal no tinan foun hamutuk ho komunidade sira hotu iha Timor laran tomak

Nune’e mós sei iha atividade semináriu ne’ebé Xefe Estadu sei konvida ninia kolega premiadu nobel sira hanesan nobel kímika, nobel Matemátika, nobel saúde ho nobel edukasaun ema sira ne’e maka sei mai atu ko’alia ho partisipante sira iha semináriu ne’e, atividade semináriu ne’e sei realiza iha Dili laran

Husi atividade desportu nian sei realiza mós eventu kurída Bisikleta ne’ebé tuir planu sei halai husi Kupaun-Indonézia tama Dili depois sei perkore Dili laran no finaliza iha Munisípiu Lautem, iha mós atividade boxing, atividade taekwondo, iha mós atividade kulturál, atividade feira no atividade espozisaun. Atividade sira ne’e sei halo hamutuk iha festivál Rabilau iha Setembru nia laran.

Atividade ne’e rasik sei hetan partisipasaun husi embaixada sira ne’ebé rezidénsia iha Dili. Nune’e mós nonu governu sei konvida parseiru sira tuir orientasaun prezidente nian atu hola parte iha festivál ne’e.

Portantu husi prosesu preparasaun sira ba eventu festivál ne’e rasik, ekipa komisaun tékniku ne’ebé lidera husi SEAK, konsege finaliza ona proposta sira ne’ebé submete ona ba Prezidente repúblika maibé proposta sira ne’e hetan uituan revizaun husi PR rasik, normalmente parte tékniku halo filafali elaborasaun hodi submete fali ba PR atubele hetan aprovasaun hodi nune’e bele sai matadalan ida ba tékniku sira hodi hala’o servisu.

Notísia relevante:MTKI dezenvolve Rabilau iha Maubisse nakfila ba turizmu komunitáriu

Jornalista: Tomé Amado

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!