BAUCAU, HEADLINE, MUNISÍPIU, SEGURANSA

PNTL kontinua monitoriza suspeitu sunu ekipamentu pezadu iha Quelicai

PNTL kontinua monitoriza suspeitu sunu ekipamentu pezadu iha Quelicai

Komandante PNTL Munisípiu Baucau, Superintendente Xefe Antoninho Mauluta. Imajen Agência TATOLI/Natalino Belo.

BAUCAU, 23 maiu 2024 (TATOLI) – Komando Polísia Nasionál Timor-Leste (PNTL) munisípiu Baucau kontinua monitoriza paraderu suspeitu na’in-tolu ne’ebé deskonfia sunu ekipamentu pezadu, hodi hein mandadu husi Ministériu Públiku (MP).

Komandante PNTL Munisípiu Baukau, Superintendente Xefe Antoninho Mauluta, esplika, parte seguransa halo ona identifikasaun no kontinua monitoriza suspeitu na’in-tolu nia paraderu atuál.

“Ita kontaktu Ministériu Públiku, tanba prosesu hotu ita rekomenda kedas ho mandadu detensaun, se despaixu mai ona ita foti direita suspeitu sira,” Komandante PNTL Baucau hateten iha Vila Nova, kuarta ne’e.

Hafoin kazu referida akontese, Komandu PNTL Baucau liuhusi Serbisu Investigasaun Kriminal (SIK) hamutuk ho Eskuadra Quelicai identifika ona ema nain-tolu ne’ebé deskonfia sai autór ba sunu ekipamentu pezadu hanesan pesoál seguransa na’in-ida no traballadór na’in-rua.

Sidadaun nain-tolu referidq halo identifikasaun iha loron-12 maiu ho inisiál hanesan DN, A no JSG.

Alende ne’e, Komandu Munisipiu Baucau iha loron-16 maiu identifika tan pesóal na’in-ida seluk ne’ebé mos tenta ameasa parte kompañia Chongqin International Construction liuhusi telefónika atu sunu tán eskavadór.

“Iha ne’eba ita tau kedas sira-ne’e autór prinsipál, ne’e mak ita aprezenta ba Ministériu Públiku depois prosesu primeira interrogatóriu mak MP sei haree,” Superintendente Xefe Antoninho Mauluta akresenta.

Komando Polisia Munísipiu Baucau kontinua akompaña autór na’in-haat nia paraderu hodi hein ba prosesu tuir mai, tanba konsidera sidadaun hirak-ne’e mak autor prinsipál ba kazu referida.

Kazu sunu eskavadór husi Kompañia Chongqin International Construction akontese iha área Arleuisi, suku Lakuliu, postu administrativu Quelicai iha oras 05:00 OTL, loron-dumingu, 12 maiu 2024.

Notísia relevante: PNTL Baucau: Sidadaun ida ameasa atu sunu ekipamentu pezadu iha Quelicai

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!