Ministru Kalbuadi enkoraja funsionáriu hotu atu servisu ho disiplina
DILI, 24 maiu 2024 (TATOLI) – Vise Primeiru Ministru no Ministru koordenadór Asuntu Ekonómiku no Ministru Turizmu no Ambiente, Francisco Kalbuadi Lay, enkoraja funsionáriu hotu atu servisu ho disiplina.
“Ha’u enkoraja funsionáriu sira ne’ebé mak tutela iha Ministériu koordenadór Asuntu Ekonómiku no Ministru Turizmu no Ambiente, tenke servisu ho di’ak no disiplina nune’e funsionamentu sira ne’ebé mak iha instituisaun sira bele la’o ho di’ak”, Francisco Kalbuadi Lay informa bainhira hala’o konferénsia imprensa iha sala konferénsia Vise Primeiru Ministru Farol, ohin.
Nia relata asuntu ne’e tanba ekipa konjunta hosi Komisaun Anti-Korupsaun (CAC), Komisaun Funsaun Públika (KFP), Inspesaun Jerál Estadu (IGE), Patrimóniu Estadu hala’o vizita supreza ba Ministériu Komérsiu no Indústria (MCI) hodi haree ba funsionamentu servisu iha instituisaun ne’e rasik.
“Sira hala’o vizita supreza ne’e tanba sira-nia servisu atu haree ba ida-ne’e, tanba ne’e husu ba funsionáriu sira nafatin servisu ho di’ak hodi serbi povu no nasaun ida-ne’e iha ita-nia rain”, nia afirma.
Iha sorin seluk, Komisáriu KFP, Agapito da Conceição, dehan ekipa konjuta hosi Komisaun Anti-Korupsaun, Inspetór Jerál Estadu, Patrimóniu Estadu no Komisaun Funsaun Públika vizita supreza ba Ministériu Komérsiu no Indústria hodi haree ba funsionamentu servisu ne’ebé mak iha.
“Ami mai Ekipa konjunta hosi Komisaun Anti Korupsaun, Inspetór Jerál Estadu, Patrimonia Estadu no Komisaun Funsaun Públika ami mai hanesan prevensaun ida liu liu ba funsionáriu sira ba ne’ebé tama servisu tarde ami rekolla ida ne’e no mós liga ba boagovernasaun ne’ebé mak iha”, Agapito hateten .
Nia dehan, hosi ekipa ida-ne’e ida idak haree ba sira nia servisu hanesan CAC, IGE no Patrimóniu Estadu haree liu ba veikúlu no aprovisionamentu liu liu utilizasaun veikúlu ba iha loron feriadu sira.
“Hosi vizita supreza CAC ho IGE foka liu ba veikúlu sira no mós aprovizionamentu, agora Patrimóniu Estadu haree liu ba veikúlu sira ne’ebé mak utilizasaun iha MCI, liuliu utiliza veikúlu sira loron feriadu hanesan sabadu no domingu, entaun ida-ne’e mak ami-nia objetivu atu halo prevensaun ida hodi hatudu ba Governu sira atu hala’o servisu tenke ho di’ak”, nia afirma.
Jornalista : Felicidade Ximenes
Editór : Zezito Silva
