DILI, 27 Maiu 2024 (TATOLI) – Servisu Agrikultura Bobonaro simu ona kombustivel litru rihun 6 husi Ministériu Agrikultura, Pekuária, Peska no Floresta (MAPPF) hodi bele enxe ba tratór sira hodi fila natar to’os-na’in sira-nia.
Diretór Servisu Agrikultura Bobonaro, Longuinhos João, haktuir katak tratór iha unidade 30, maibé 19 maka funsiona no sia avaria, ne’ebé ekipa sira husi nasionál halo ona manutensaun hodi bele apoia serbisu iha terrenu.
“Ami hetan ona kombustivel ba tratór hodi tulun agrikultór sira ne’ebé envolve iha grupu hamutuk 200-resin. Ida ne’e, ita fasilita mina ba tratór sira hodi halai natar grupu sira ne’ebé laiha kbiit atu fila sira-nia rai”, Longuinhos João dehan iha Comoro.
Tuir nia, mina ho litru rihun 6 ne’e la fó direta ba grupu sira, maibé parte Servisu Agrikultura mak jere atu tratór 19 ne’e bele halo servisu iha baze hodi apoia grupu agrikultór sira.
Nune’e mós, Diretór-Jerál Agrikultura, Kafé no Planta Industriál, Martinho Laurentino Soares, afirma katak ho apoiu kombustivel ne’e bele hakmaan difikuldade ne’ebé grupu sira enfrenta, nune’e sira bee kontinua kuda hare iha natar sira.
“Ha’u husu ona ba sira katak ho apoiu kombustivel ne’e sira bele Jejre ho didi’ak nune’e tulun grupu sira atu tinan ida ne’e bele hasa’e produsaun hare iha Bobonaro”, realsa.
Jornalista: Tomé Amado
Editora: Maria Auxiliadora
