BAUCAU, HEADLINE, MUNISÍPIU, SEGURANSA

PNTL Baucau rekolla reseita rihun $6-resin ba kofre estadu

PNTL Baucau rekolla reseita rihun $6-resin ba kofre estadu

Osan dólar amerikanu. Imajen/Espesiál

BAUCAU, 27 maiu 2024 (TATOLI) – Komandu Polísia Nasionál Timor-Leste (PNTL) liuhusi seksaun tránzitu munisípiu Baucau rekolla reseita hamutuk $6.675 ba kofre estadu durante fulan-rua.

Xefi Seksaun Tránzitu PNTL Munisípiu Baucau, Inspetór Asistente Alfredo Ruak Therik, esplika, reseita hirak-ne’e rekolla iha fulan-abríl no maiu ne’ebé maihusi motorista sira-ne’ebé la uza kapasete, laiha karta kondusaun, dokumentu laiha no kontra sinál tránzitu ka dekretu- lei kódigu estrada.

Alende ne’e, PNTL Baucau foti medida no fó sansaun ho valór koima hamutuk $50 ba transporte públiku sira-neebé utiliza reben hanesan mikrolete rute Vila Nova no Antiga, suku no postu sira.

“Polísia nafatin halo vijilánsia pasa revista, hetan transporte sira-ne’ebé maka reben metan ita tenke hapara, haruka kondutór rasik mak lees no ita aplika hela koima ba tuir lei kódigu nian ba iha kondutor sira,” Xefe Seksaun Tránzitu PNTL Munisípiu Baucau hateten iha Vila Antiga, segunda ne’e.

Seksaun tránzitu PNTL Baucau liuhusi pasa revista halo apreensaun ba transporte públiku hanesan mikrolete no bís hamutuk 57 tanba konsidera kontra dekretu-lei kódigu estrada.

Tuir lei kodigu númeru 6/2003, koima sira akumula hanesan bainhira transporte laiha xapa-matríkula sei selu koima ba kofre estadu hamutuk $60.00, veikulu seidauk rejistu hamutuk $60.00 to’o $300.00.

Laiha dokumentu $30.00, la utiliza kapasete $30.00, kontra orden autoridade $45.00, para iha zebra kros leten $60.00, karta kondusaun la tuir kategoria $120, karta kondusaun liu prazu $60.00.

“Atu hameno ba motorista sira kumpri nafatin lei no regra, karta kondusaun la iha tenke ba trata tanba baze legál ne’ebe maka atu uza viatura públiku maka ita-nia kartaun kondusaun,” Inspetór Asistente, Alfredo Therik akresenta.

Alende ne’e, laiha karta kondusaun konsidera kontra kódigu penál artigu 207 sei multa no kastigu tinan 2, transporte uza kanu-resin $15.00, para iha ponte, kruzamentu, rai lolon no entrokamentu $15.00, laiha lampu travaun $60.00.

Nune’e, tuir diploma ministeriál númeru 2-3/MTCOP/2003 regula transporte publiku ne’ebé reben iha vidru nakukun sei hetan koima, selu $50.00 too $70.00 no kondutór la uza uniforme sei multa husi $20 to’o $40.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!