BAUCAU, HEADLINE, MUNISÍPIU, SEGURANSA

PNTL Baucau asegura sidadaun Indonézia na’in-tolu no na’in-ida halai lakon

PNTL Baucau asegura sidadaun Indonézia na’in-tolu no na’in-ida halai lakon

Sidadaun estranjeiru husi Indonézia ne'ebé PNTL asegura iha Komandu munisípiu Baucau, kinta (30/05). Imajen Agência TATOLI/Natalino Belo.

BAUCAU, 30 maiu 2024 (TATOLI) – Komandu Polísia Nasionál Timor-Leste (PNTL) munisípiu Baucau asegura sidadaun Indonézia hamutuk na’in-tolu no na’in-ida halai lakon tanba uza fali vistu turismu hodi halo atividade negósiu.

Xefe Serbisu Investigasaun Kriminál (SIC), PNTL Baucau, Sarjentu Xefe Bernadete Belo, esplika, hafoin simu informasaun husi intelijénsia hanesan SIP no J2, parte seguransa liuhusi ekipa patrullamentu asegura sidadaun estranjeiru hirak-ne’e iha loron-kuarta no kinta, 29-30 maiu iha Lacoda no área Teulale.

“Ita kaptura ba sidadaun na’in-tolu mai husi Indonézia maibé ida halai lakon,” Xefe Servisu Investigasaun Kriminál, Sarjentu Bernadete Belo iha Vila Nova, ne’e.

PNTL Baucau simu informasaun katak iha sidadaun Indonézia na’in-haat maibe na’in-ida mak konsege halai lakon no na’in-tolu seluk mak konsege asegura.

Sidadaun na’in-tolu ne’ebé asegura ho inisiál AJ idade 42 kaptura iha área Lakoda, Suku Seiçal iha loron 29 fulan-maiu, enkuantu rua-seluk hanesan DR idade 19 ho J idade 39 kaptura ohin iha área Teulale, postu administrativu Baukau Vila.

Komandu Polísia Munísipiu Baucau, konsidera sidadaun hirak-ne’e kontra lei númeru 11/2017, Migrasaun no Azilu, artigu 11 kona-ba direitu tama no sai hanesan utiliza vistu turista hodi halo negósiu fa’an sasán brinku no korrente, osan-mean inklui seluk tan.

“Sira-nia atividade ne’e viola vistu iha Timor-Leste kontra lei migrasaun nian iha artigu 11,” Bernadete Belo akresenta.

PNTL Baucau halo ona koordenasaun ho parte migrasaun atu prosesa sidadaun na’in-tolu ne’e tuir lei no regulamentu ne’ebé válidu iha Timor-Leste no kontinua buka-tuir sidadaun na’in-ida seluk ne’ebé seidauk identifika paradeiru depois halai sees husi parte seguransa.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!