AOS realiza Live Painting selebra loron labarik
DILI, 01 juñu 2024 (TATOLI)— Grupu AOS (Art of Silence) realiza atividade Live Painting hodi selebra loron labarik ho tema “Karik Ha’u Hatene” hanesan meius hodi fahe esperensia konaba arte pinta ba labarik sira.
Membru AOS, Raimundo Faustino hateten atividade Live Painting ne’e realiza ho inisiativa atu hakbesik aan ba komuniade sira liu-liu halo Live Painting iha fatin publiku sira hanesan jardim sira iha kapital Dili.
“Atividade ohin loron nian hodi selebra loron labarik nian, ida ne’e ba dala lima ona, ne’e hodi fahe esperensia konaba oinsa pinta ho diak ba alin kiik sira. Iha primeiru sente tauk karik sira simu ka lae ita nia hanoin maibé wainhira koko hela deit bele ona. Ohin alin barak mak mai aprende no iha akompaña husi inan-aman,” Raimundo Faustino dehan ba Tatoli iha Jardim Farol, sábadu ne’e.
Nia esplika, aliende partisipa ho labarik sira, iha mos joven sira ne’ebé involve hodi partisipa iha atividade live painting hodi hatene oinsa bele pinta, mistura kor sira no fasilita sira konaba metodu pinta sira.
Partisipante Aniceto Perreira sente kontente bele partisipa iha atividade AOS Live Painting nian hodi hasoru pintór sira ne’ebé nakonu ho espiritu voluntariu arte nian hodi fahe sira nia matenek ne’ebé iha no mos hametin amizade ba ema sira ne’ebé gosta arte.
Atividade Live Painting husi Grupu AOS ne’e rasik halao voluntariamente husi nia membru sira ho nia ekipamentu mai husi membru rasik. AOS mai husi membru oin-oin hanesan Arte Moris, Gembel, Tokodede Art, Arte Uma Lalatak, Baraca Art, Kakuluk Lahuk, Fini Art no seluk tan.
Jornalista : Cidalia Fátima
Editora : Armandina Moniz
