EKONOMIA, HEADLINE

Inspetór Jerál Jogu rekoñese seidauk iha kondisaun ruma regula futu-manu

Inspetór Jerál Jogu rekoñese seidauk iha kondisaun ruma regula futu-manu

Reprezentante MCAE, Anibal Carvalho Martins. Imajen Tatoli/Francisco Sony

DILI, 03 juñu 2024 (TATOLI) — Inspetór Jerál Jogu, Anibal Carvalho Martins, rekoñse katak  to’o agora seidauk iha kondisaun ruma atu regula atividade futu-manu iha Timor-Leste, maibé iha tempu badak sei prepara kondisaun, tanba mandatu ida-ne’e, sei harii fatin ba futu-manu, hosi jogu ne’e bele selu taxa ba Estadu.

“Durante ne’e ita haree atividade manu-futu ne’e domina iha ita-nia rain, tanba manu-futu sai hanesan jogu tradisionál, maibé to’o agora ita seidauk iha kondisaun ruma ne’ebé mak atu bele regulariza sira-nia atividade, tanba ne’e hau-nia mandatu ha’u sei harii fatin nune’e sira bele selu taxa ba Estadu”, Anibal Carvalho Martins informa bainhira partisipa serimónia entrega servisu  ba diretór foun SERVE,I.P iha salaun Delta Nova, ohin.

Nia afirma, Governu sei prepara kondisaun sira, iha tempu besik, atu bele regulariza atividade futu-manu tanba daudaun ne’e buras ona iha Dili no mós munisípiu sira.

“Tempu besik ita prepara kondisaun balun oinsá atu haree regulariza sira tuir fatin, tuir lei hateten katak kualker atividade jogu tenke 500 metru hosi eskola no komunidade sira-nia uma, tanba ita hatene ona katak iha Dili laran agora daudaun futu-manu buras los ona, tanba ne’e ita tau hela atensaun ba ida-ne’e, espera katak ba oin ita bele valoriza nune’e kria kondisaun oinsá atu sira mós hatama reseita ba Estadu”, nia akresenta.

Nia haktuir, atividade bola guling daudaun ne’e taka ona maibé antes ne’e hatama ona reseita ba Estadu tanba hetan lisensa permanente, hahú iha 2022 mai ne’e porvolta 200 mil dolares.

“Futu-Manu, ha’u-nia mandatu ita foin planu atu hatama reseita, maibé kona-ba bola guling hatama ona reseita ba Estadu hanesan inspesaun jerál uluk fó ona lisensa ba sira atu hala’o sira-nia atividade no sira hatama reseita ba estadu porvolta 200 mil dolares ona”, nia relata.

Nia adianta, hahú semana ne’e, ekipa inspetór nian sei halo fiskalizasaun ba futu-manu fatin sira iha Dili laran hodi bele identifika númeru hafoin bele kria kondisaun.

“Hahú aban ba oin ha’u-nia ekipa inspetór sira sei halo fiskalizasaun ba fatin sira ne’e hodi identifika númeru manu futun hira mak iha kapitál Dili, tanba ita haree ba kondisaun no rekezitu sira oinsá atu halo jestaun iha ne’eba depois mak ita prega ninia persentajen ba Estadu”, nia konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!